Revista “Conde Nast Traveler”, e përfshinë Kosovën në listën e saj prej 24 vendeve më të mira për t’i vizituar në vitin 2024

Revista luksoze e udhëtimit dhe stilit të jetesës, Conde Nast Traveler ka publikuar një artikull kushtuar “Vendeve më të mira për t’i vizituar në vitin 2024”.

Në artikullin e botuar në muajin nëntor, por që më tepër viral në mediat sociale, posaçërisht në X (ish-Twitter) u bë ditëve të fundit, në listën prej 24 vendeve, e përfshirë nga Conde Nast Traveler është edhe Republika e Kosovës, derisa brenda tekstit përshkrues, thuhet se vendit i mungojnë disa pasuri të shteteve fqinje, por përsëri ka aq shumë pika turistike për të vizituar.

“Kosovës së vogël i mungojnë plazhet mahnitëse të Shqipërisë dhe resortet luksoze të Malit të Zi, por vendi më i ri i Evropës ka maja të mrekullueshme, fshatra baritore dhe mikpritje që ngroh zemrën, një kombinim ideal për ecje shumëditore dhe udhëtime me biçikletë”, shkruhet në artikull.

“2024 do të shënojë 25 vjetorin që nga përfundimi i luftës në Kosovë, dhe tani ka shumë për të zbuluar në rajon. Duke ndjekur gjurmët e shtigjeve aventureske ndërkufitare si Majat e Ballkanit dhe Scardusi i Lartë, rruga e çiklizmit Trans Dinarica hapet në vitin 2024, duke kaluar rrugën përtej minareve që rrethojnë lumin e njëjtë të Prizrenit, përmes qytetit të tregut osman të Gjakovës, dhe për në Pejë”, shkruhet tutje.

Kosovën, në artikullin e publikuar, e ka përshkruar amerikania, Naomi Tomky, e cila njihet për shkrimet e saj mbi ushqimin dhe udhëtimet.

Tomky, në detaje i ka përshkruar disa qytete dhe veçoritë e tyre atraktive, që ato mund t’u ofrojnë vizitorëve.

“E vendosur në buzë të grykës së Rugovës, Peja shërben si kamp bazë për aventurat e shumta të vendit në natyrë. Një shteg i ri i asfaltuar do të lidhë së shpejti shëtitoren e lumit Lumbardhi me një shteg tjetër të njohur – fillimi i rrugës nga jugu në perëndim përmes Bjeshkëve të Nemuna”, shkruan ajo.

“Dy rrugë shtesë të ardhshme lidhin shtigjet në malet e Rugovës me ujëvarën e Drinit të Bardhë dhe shpellën e Radacit. Alpinistët mund të pushojnë kockat e lodhura dhe të mbushin barqet e uritur më larg nga qyteti në bujtina rurale, ku pjatat tradicionale kosovare përfshijnë flija, që pos tjerash, gatuhet me qumësht vendor”, përfundon ajo.

Pos, Kosovës, në listën prej 24 vendeve “më të mira për t’i vizituar në vitin 2024” u përfshinë: Greqia, Hungaria, Gana, Japonia, Madagaskari, Kolumbia, Ekuadori, Shri Lanka jugore, e të tjera.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.