Në Austri po përgatiten thasët me rërë.
Në Republikën Çeke janë zbrazur rezervuarët, ndërsa në Poloni priten përmbytje të shpejta.
Të gjitha këtyre, ju bashkohen paralajmërimet e sinoptikanëve.
Evropën Qendrore e presin ditë me reshje “potencialisht katastrofike”.
Kështu shkruan multimediali britanik “BBC” në artikullin e tij.
Kryeministri polak Donald Tusk deklaroi sakaq se nuk ka “asnjë arsye për panik”.
Ai mori pjesë në një konferencë për rrezikun e përmbytjeve në Wroclaw, mes parashikimeve të reshjeve prej 15 centimetrash në katër provinca jugore.
Në Austri, shiu i dendur dhe bora në male tashmë kanë çuar në ndërprerje të udhëtimeve.
Kancelari Karl Nehammer ka thënë se ushtria është gati të angazhojë deri në 1 mijë ushtarë nëse është e nevojshme.
Kryeqyteti çek nuk po rrezikon, pas përmbytjeve që shkatërruan qytetin dy dekada më parë.
Praga shpreson të shpëtojë nga më e keqja e përmbytjeve.
Vëmendja është përqendruar këtë fundjavë në pjesët qendrore dhe lindore të vendit, veçanërisht në Moravinë Veriore, ku në vitin 1997 humbën jetën 50 persona.
Pasi mori pjesë në një konferencë nga shërbimet e urgjencës në Poloninë jugperëndimore, Tusk u përpoq të siguronte publikun se parashikimet nuk ishin “shumë alarmante”.
Madje, sipas tij nuk kishte asnjë arsye për të parashikuar ndonjë gjë në një shkallë që mund të shkaktonte një kërcënim në të gjithë vendin.
Instituti polak i Meteorologjisë dhe Menaxhimit të Ujërave zgjeroi më vonë nivelin më të lartë të alarmit nga katër provincat jugore deri në grykën e lumit Odra në Szczecin, ku derdhet në Detin Baltik.
Austria përjetoi gushtin e saj më të nxehtë që nga fillimi i regjistrimeve, sipas institutit federal Geosphere Austria.
Tani paralajmërohet për 10-20 centimetra reshje shiu në shumë rajone brenda pak ditësh.
Në disa vende, mbi 20 centimetra është e mundur, veçanërisht në malet e Austrisë së Epërme dhe të Poshtme dhe në Styria e Epërme veriore.
Qendra austriake e paralajmërimit të stuhive UWZ thotë se në disa zona, rekordet e mëparshme për të gjithë muajin shtator do të “kapërcehen në vetëm pak ditë”.
Manuel Kelemen, parashikues i televizionit Puls24, thotë nga pikëpamja meterologjike, “ajo që po përjetojmë është e jashtëzakonshme, në mos e paprecedentë”.
Marrë dhe përshtatur nga BBC për Albanian Post
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
