Renditja e re e FIFA-s: Spanja shkon në ‘top 3’, Shqipëria në vendnumëro

FIFA ka publikuar renditjen e re të ekipeve kombëtare pas përfundimit të dy turneve Euro 2024 dhe Kupa e Amerikës. Argjentina, kampione e Kupës së Amerikës, ka ruajtur vendin e saj në krye të kësaj renditjeje. Spanja, kampione e Euro 2024, ka shkuar në vendin e tretë, pas Francës. Ndërkohë, Shqipëria ka mbetur në vendin e 66-të.

Organi drejtues i futbollit në botë, FIFA, ka publikuar renditjen më të fundit, atë të datës 18 korrik 2024. Renditja e ardhshme do të jetë pas 63 ditësh, më 19 shtator 2024.

Argjentina, kampione e Kupës së Amerikës 2024, një titull i pasuar nga Kupa e Amerikës 2021 dhe Kupa e Botës 2022, qëndron sërish në krye.

Spanja, kampione e Euro 2024, ka ngjitur 5 vende, duke shkuar në pozitën e tretë. “Furia e Kuqe” është ekipi që ka grumbulluar më shumë pikë gjatë kësaj periudhe, +105.75 pikë.

Një surprizë është futja në “top 10”-she e Kolumbisë (9). Skuadra finaliste e Kupës së Amerikës pati një ecuri të jashtëzakonshme prej 28 ndeshjesh pa humbje, para se të mundej 1-0 në kohën shtesë nga Argjentina në finale.

Venezuela, pjesëmarrëse në finalet e Kupës së Amerikës 2024 (çerekfinaliste), ka bërë ngjitjen më të madhe në renditje me 17 vende, duke shkuar në pozitën e 37-të aktualisht.

Republika Çeke, një kundërshtare i Shqipërisë në kualifikueset e Euro 2024 dhe me një paraqitje të dobët në Kampionatin Evropian, është kombëtarja me rënien më të madhe, 13 vende. Aktualisht qëndron në vendin e 47-të.

Shqipëria, edhe pse pjesëmarrëse në Euro 2024, nuk ka njohur asnjë ndryshim në pozitën e saj. Kuqezinjtë qëndrojnë në vendin e 66-të në botë.

Kosova, e cila nuk kishte angazhime në kohët e fundit, përveç miqësoreve, ka rënë me një vend, duke u renditur në pozicionin e 106-të.

‘Top 10’ ekipet më të mira në renditjen e FIFA-s:

1.Argjentina

2.Franca

3.Spanja

4.Anglia

5.Brazili

6.Belgjika

7.Holanda

8.Portugalia

9.Kolumbia

10.Italia

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.