Remitancat vendosin rekord të ri historik, 833 milionë euro për familjet në vitin 2022

Gjatë vitit të kaluar, dërgesat e emigrantëve kanë prekur një rekord historik prej 833 miliardë eurosh.

Të paktën kështu tregojnë shifrat më të fundit nga Banka e Shqipërisë.

Kjo shifër është edhe më e lartë se viti 2008, kur regjistrohej rekordi i mëparshëm, sipas transmetuesit “Scan”, megjithatë para krizës financiare globale të viteve 2008-2009 niveli i remitancave ishte ndjeshëm më i lartë se periudha pasuese.

Në Shqipëri, rritja e ndjeshme e remitancave ka nisur që me pandeminë, por është theksuar edhe më shumë me krizën e çmimeve të vitit të kaluar.

Emigrantët kanë dërguar të paktën 73 milionë euro më shumë se viti pararendës 2021. Ndryshe 9.6 për qind më shumë dërgesa nga emigrantët gjatë vitit 2022, krahasuar me vitin 2021.

Kurse në krahasim me periudhën para dy krizave, pandemisë dhe çmimeve, emigrantët kanë sjellë në vend të paktën 132 milionë euro më shumë në vit.

Shifrat tregojnë se tremujori i fundit i vitit të kaluar ka thyer po ashtu një rekord historik, me rreth 241 milionë euro dërgesa. Një shifër kjo edhe më e lartë se tremujori i dytë i vitit 2009, kur emigrantët dërgonin 240 milionë euro.

Kjo periudhë ka mbajtur deri në fund të vitit të kaluar rekordin historik sa i përket remitancave në vendin tonë, sipas “Scan”-it.

Në tremujorin e katërt të vitit të kaluar, remitancat rezultojnë plot 8.9 për qind më të larta se tremujori i njëjtë i vitit pararendës.

Sakaq, nga shifrat del se emigrantët kanë ndikuar mjaftueshëm për të zbutur krizën e çmimeve për familjet shqiptare, madje duke dërguar edhe më shumë para se gjatë pandemisë, kur shumë ekonomi familjare u prekën rëndë nga shpenzimet për shëndetësinë.

Dërgesat e parave nga emigrantët gjatë vitit të kaluar kanë ardhur pavarësisht faktit se kriza e çmimeve ka prekur thuajse çdo cep të globit dhe vendet ku ka një përqendrim të lartë të emigrantëve shqiptarë, si vendet e Bashkimit Evropian, Britania e Madhe apo Shtetet e Bashkuara të Amerikës.

Norma e inflacionit në këto vende gjatë vitit të kaluar ka qenë ndjeshëm më e lartë se shifra që Instituti i Statistikave ka raportuar.

INSTAT raporton se gjatë vitit të kaluar, norma e inflacionit në Shqipëri fiksohet pranë “vetëm” 6.7 për qind, ndërkohë që gjatë së njëjtës periudhë kohore në BE çmimet janë rritur me plot 9.2 për qind.

Por kjo nuk i ka ndaluar emigrantët shqiptarë të sjellin ndihma monetare për familjet e tyre në vështirësi.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.