Toby Vogel, ekspert i politikës së jashtme të BE-së nga Këshilli i Politikave të Demokratizimit (DPC), e ka cilësuar si “hap të vonuar”, rekomandimin e përfaqësuesit të lartë të Bashkimit Evropian për politikë të jashtme dhe siguri, Josep Borrell, për heqjen e masave ndëshkuese ndaj Kosovës, te vendosura në qershorin e vitit të kaluar, për shkak të situatës në Veri të Kosovës.

Në vlerësimin e tij këto masa nuk do të duhej të vendoseshin kurrë, sidomos në kontekstin kur Serbia nuk është dënuar asnjëherë për obstruksionin e saj.

“Një hap i vonuar prej kohësh. Në fakt, këto masa nuk do të duhej të vendoseshin kurrë në radhë të parë, sidomos jo në mungesë të ndonjë pasoje për Serbinë për shkak të dekonstruktivitetit të saj”, ka thënë ai në një postim në platformën sociale, X.

Radio Evropa e Lirë, të mërkurën, duke u thirrur në burimet diplomatike brenda Unionit, raportoi se diplomati spanjoll,  në raportin e përpiluar për Kosovën, rekomandoi shtetet anëtare të qëndrojnë për heqjen e masave ndëshkuese ndaj Kosovës.

“Duke marrë parasysh hapat që ka ndërmarrë Kosova drejt përmbushjes së kërkesave të BE-së të shprehura në deklaratën e 3 qershorit të vitit 2023, përfaqësuesi i lartë i rekomandon Këshillit të BE-së që të marrë qëndrimin e heqjes së masave ndaj Kosovës, në të njëjtën kohë duke respektuar prerogativat institucionale”, theksoi një burim për REL-in të mërkurën.

Në rekomandimin e shefit të diplomacisë evropiane, largimi i masave kufizuese cilësohet “sinjal politik” që pritet të kontribuojë në “kontekstin e balancuar” në të cilin procesi i dialogut për normalizimin e marrëdhëniet ndërmjet Kosovës dhe Serbisë nën ndërmjetësimin e BE-së të avancojë.

Borrelli dorëzoi të martën e 18 qershorit raportin për masat ndaj Kosovës para shteteve anëtare, përkatësisht rreth hapave të Kosovës në përmbushjen e detyrimeve për heqjen e masave ndëshkuese që BE-ja i vendosi në qershor të vitit të kaluar për shkak të përshkallëzimit të situatës në veriun e vendit.

Raporti për heqjen e masave pritet të diskutohet sot në takimin e Komitetit për Politikë dhe Siguri të BE-së në nivel të ambasadorëve të vendeve anëtare. Autoritetet në Kosovë janë në pritje të një raporti pozitiv rreth masave. Megjithatë, rekomandimi i Borrellit s’do të thotë që masat hiqen menjëherë.

Në bazë burimeve diplomatike, heqja e masave kufizuese ndaj Kosovës mund të jetë në rend dite edhe në takimin e Këshillit të BE-së për Punë të Jashtme, që zhvillohet në nivel ministrash më 24 qershor. Pastaj, shërbimi i jashtëm i BE-së (EEAS) mund ta njoftojë zyrtarisht Kosovën për heqjen e tyre.

‘Borrell rekomandon heqjen e masave ndaj Kosovës’