Kryeministri i Kosovës, Albin Kurti, ka thënë se shteti që ai drejton dhe qytetarët e tij e kanë kaluar në test në rëndësishëm, pas përfundimit të regjistrimit të popullsisë.
Këto komente, Kurti i ka bërë përmes një postimi në Facebook, ku e vlerësoi me notat më të larta të gjithë procesin që filloi më 5 prill.
“Për 50 ditë, rreth 2600 regjistrues në 38 komuna të Republikës sonë, kanë mbledhur të dhëna esenciale për politikat, strategjitë, projektet e vendimet e shtetit për 10 vitet e ardhshme”, shkroi Kurti.
Nga aspekti profesional e teknik, siç thekson kryeministri, procesi i Regjistrimit të Popullsisë, Ekonomive Familjare dhe Banesave “është vlerësuar me nota të larta nga ekipet monitoruese të organizatave ndërkombëtare partnere, UNFPA dhe UNECE, ndërkohë që vlerësimet fillestare tregojnë që përqindja e pjesëmarrjes së popullsisë dhe gjithëpërfshirja, është ndër më të lartat edhe në nivel ndërkombëtar”
Në këtë drejtim, kreu i ekzekutivit ka potencuar se shteti i Kosovës dhe qytetari i Republikës “e kanë kaluar një test të rëndësishëm në organizimin dhe pjesëmarrjen në një ndër ndërmarrjet më të mëdha institucionale, që u përmbyll sot”.
Ndryshe, regjistrimi i popullsisë nisi më 5 prill.
Fillimisht ishte caktuar që të përfundonte më 17 maj, por pas kërkesave të disa komunave, procesi u shty deri më 24 maj.
Lista Serbe – partia kryesore e serbëve në Kosovë e cila gëzon mbështetjen e Beogradit – kishte thënë se serbët nuk do të merrnin pjesë në procesin e regjistrimit të popullsisë, dhe ashtu ndodhi.
Regjistrimi i fundit i popullsisë në Kosovë, në vitin 2011, nuk ishte mbajtur në katër komunat në Veri – Mitrovicë e Veriut, Leposaviq, Zubin Potok dhe Zveçan – të banuara me shumicë serbe, ndërsa serbët nga komunat e tjera në jug, me ftesë të Beogradit, kryesisht e kishin bojkotuar procesin.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com