Regjistrimi i koalicioneve deri me datë 25 shkurt

Partitë politike duhet të dorëzojnë listën e kandidatëve për deputetë deri me datë 6 mars, datë e cila përkon 50 ditë para datës së zgjedhjeve e përcaktuar në nenin 67 të Kodit Zgjedhor.

Përpara datës 6 mars, me 15 shkurt partitë kanë afatin e fundit kur duhet të regjistrohen në Komisionin Qendror të Zgjedhjeve (KQZ) për të marrë pjesë në zgjedhjet e 25 prillit.

Gjithashtu subjektet politike kanë 10 ditë kohë të vendosin nëse do të hyjnë në zgjedhje me koalicion apo vetëm.

Pra, deri në 25 shkurt partitë duhet të vendosin nëse do të futen vetëm me listën e partisë, apo do të përfshijnë në të edhe nga kandidatë nga parti të tjera në koalicion.

Çështja koalicioneve ka të bëjë vetëm me opozitën pasi përfaqësues të maxhorancës janë shprehur se Partia Socialiste do të dalë me një listë të vetme.

Gjithashtu edhe disa parti të krijuara rishtazi, si ajo e Astrit Patozit dhe Jozefina Topallit, kanë deklaruar se do bashkohen me një listë në betejën e 25 prillit.

Subjektet politike duhet të avancojnë me formalizimin e ekipeve me të cilat do të dalin para qytetarëve deri në datat e caktuara.

 Numri i partive të regjistruara do të jetë tregues edhe për modelin e fletës së votimit, e cila, këtë radhë do të jetë më e komplikuar, meqë duhet të përmbajë jo vetëm emrat e partive që garojnë, por edhe të kandidatëve, të cilët po ashtu do të grumbullojnë vota personale sipas formulës së listave të hapura. /AlbanianPost.com

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.