Refuzohen gjashtë nga shtatë ankesat e kandidatëve për asamble komunale

Gjykata Supreme e Kosovës, nga shtatë ankesat e kandidatëve për asamble komunale, gjashtë prej tyre i ka refuzuar.

Pas certifikimit të zgjedhjeve lokale, Supremja ka pranuar 19 ankesa të kandidatëve për asamble komunale, të ushtruara kundër vendimeve të Panelit Zgjedhor për Ankesa dhe Parashtresa, ku vetëm shtatë prej tyre janë përfunduar.

“Supremja i ka refuzuar si të pabazuara ankesat, sekretarit të Nismës Socialdemokrate në Prizren si dhe kandidatit për asamble komunale të kësaj partie në Gjakovë”, thuhet në njoftimin e gjykatës.

Po ashtu, është refuzuar ankesa e kandidatit për anëtar të Kuvendit Komunal në Gjakovë, nga subjekti politik Partia Shqiptare Demokristiane e Kosovës (PSHDK), si dhe ankesën e B.H., kandidate për anëtare të Kuvendit Komunal të Prishtinës nga subjekti politik Lidhja Demokratike e Kosovës, paraqitur kundër vendimit të PZAP-së.

Në anën tjetër janë refuzuar edhe ankesat e A.H., kandidat për deputet në Kuvendin e Komunës së Klinës, nga subjekti politik, Lëvizja Vetëvendosje, dhe E.M., kandidat për anëtarë të Kuvendit Komunal në Komunën e Prizrenit, nga i njëjti subjekt politik.

Sipas njoftimit thuhet se Supremja ka njoftuar se në çështjen juridike të D.K., nga subjekti politik Demokratët për Drenasin, paraqitur kundër vendimit të PZAP-së, e ka pranuar si pjesërisht të bazuar ankesën e tij, si dhe ka ndryshuar vendimin e PZAP-së, duke urdhëruar Komisionin Qendror të Zgjedhjeve që të rishqyrtojë vendimin e saj.

“Vetëm përkitazi me kandidatin e sipërpërmendur dhe të vërtetojë plotësisht si dhe saktë numrin e votave të fituara nga ai, në bazë të formularëve të rezultateve të kandidatit, në të gjitha vendvotimet e Komunës së Drenasit, si dhe të njëjtat të përfshihen në rezultatin përfundimtar”, vijon njoftimi.

Kandidatët për asamblistë kanë të drejtë të paraqesin ankesat e tyre në Gjykatë Supreme, kundër vendimeve të PZAP-së, në afat prej 24 orëve, nga momenti i pranimit të vendimit të PZAP-së, ndërkaq Gjykata Supreme i ka në dispozicion 72 orë për të vendosur për secilën ankesë, nga momenti i pranimit të tyre në Gjykatë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.