Real-i gati të shesë Varane-n në verë nëse nuk rinovon

Situata në lidhje me kontratën e Sergio Ramos-it ka marrë shumë nga titujt e gazetave këto javë, por klubi gjithashtu rrezikon të humbasë edhe një tjetër mbrojtës kryesor. Marrëveshja aktuale me Raphael Varane-n zgjat deri në 2022 dhe ka dyshime në klub se francezi nuk do e rinovojë atë.

Nëse Kampioni i Botës, nuk rinovon në javët e ardhshme, Real Madrid-i po planifikon shitjen e mbrojtësit, në mënyrë që të shmangi largimin me parametra zero, vitin e ardhshëm. Sidoqoftë, përparësia e klubit është të bind lojtarin për të rinovuar.

Partneriteti me CAA Sports

Varane është nën marrëveshje partneriteti me CAA Sports, një agjensi sportive, që është shumë aktive në futbollin anglez. Përfaqësuesi i Varane-s është i vëllai, Anthony.

Përveç përfaqësimit të Carlo Ancelotti-t dhe Dele Alli-s, CAA Sports gjithashtu ka partneritet me agjensinë Gestifute të Jorge Mendes-it, të cilët mbajnë të drejtat e marketingut dhe imazhit të Cristiano Ronaldo-s, Joao Felix-it, James Rodriguez-it dhe Jose Mourinho-s.

Varane 27-vjeç, ka akoma shumë për të luajtur në karrier. Kjo e bën atë një nga lojtarët më të kërkuar në treg. Sipas Transfermarket-it, qendërmbrojtësi ka një vlerë në treg rreth 70 milionë euro, lojtari i tretë më i shtrenjtë te madrilenët, pas Thibaut Courtois dhe Casemiro-s me nga 75 milionë euro.

Alaba ishte shënjestra kryesore

Real-i e di që ka ndërlikime me Ramos-in dhe Varane-n dhe që në një të ardhme të afërt, ekipi mund të jetë pa të dy qendërmbrojtësit. Kjo është arsyeja se pse në afatin kalimtar të janarit, Los Blancos kërkoi nënshkrimin e David Alaba-s nga Bayern Munich-u, të cilit i mbaron kontrata në verë.

Mbrojtësi austriak ra dakort të transferohej në kryeqytetin spanjoll, siç ka raportuar Marca, në fundin e sezonit. Nëse Real Madrid-i do të ketë Alaba-n dhe Eder Militao-n për sezonin tjetër, nuk është e mjaftueshme, ndaj nuk përjashtohet që klubi të vihet në lëvizje për afrimin e një tjetër qendërmbrojtësi. Pau Torres-i, Diego Carlos-i dhe Jules Kounde janë opsionet e mundshme.

Sfida të reja

Varane dhe Alaba janë në situata të ngjashme. Të dy janë në moshë të afërt dhe kanë arritur shumë në karrierën e tyre. Kanë një dekadë apo më shumë, që luajnë në nivele të larta, duke fituar shumë trofe me klubet e tyre përkatëse dhe të dy tani janë në kërkim të sfidave të reja. Përsa i përketë Varane-s, ai përfiton vetëm gjashtë milionë euro në Santiago Bernabeu.

Varane e konsideroi largimin në 2019

Real Madrid-i u njoftua për herë të parë mbi largimin e Varane-s në verën e 2019, kur ai mendoi për herë të parë largimin nga Madridi.

Por, ishte vetë futbollisit që në një intervistë për Marca-n tha se do të qëndronte në Madrid, por se gjithçka duhet të mbaronte një ditë. Manchester United-i dhe Paris Saint-Germain-i po ndiqnin situatën me interes.

Asnjë nxitim për të rinovuar

Kthimi i Zinedine Zidane-s te Real-i, i cili ua kishte sugjeruar Varane-n që në kohën kur ky i fundit ishte 18-vjeç, bëri që qendërmbrojtësi të qëndronte. Sidoqoftë, akoma nuk ka rinovim të kontratës që nga 2017, gjë e cila të bën të mendosh se mbrojtësi po kërkonë një ambient të ri.

Rëndësi të madhe

Që nga koha e largimit të Pepe-s si partner në qendrën e mbrojtjes me Ramos-in, Varane është bërë një nga pikat më të forta në atë pozicion për Real Madrid-in.

Me Real-in numëron 364 paraqitje, ku ka shënuar 17 gola, dy prej të cilëve në ndeshjen e fundit në La Liga, kundër Huesca-s. Këtë sezon, vetëm Courtois-i ka luajtur më shumë minuta sesa Varane për Real Madrid-in. Krahas Ramos-it, Marcelo-s dhe Karim Benzema-s, qendërmbrojtësi është një nga lojtarët më të “vjetër” në skuadrën e Zidane-s dhe një potencial i mundshëm për të qenë kapiteni i ardhshëm. A mund ta bindë kjo të qëndrojë?

Objektivi 50 milionë

Nëse Varane nuk bie dakort të zgjasë kontratën e tij para verës, Real Madrid-i do të përpiqet ta shesë atë.

Ata e dinë që United-i dhe PSG-ja e kanë ndjekur atë prej disa kohësh, ndërsa, Chelsea dhe Juventus-i mbeten gjithashtu të interesuar.

Duke patur parasysh që qendërmbrojtësit i ka mbetur vetëm një vit nga marrëveshja dhe duke patur parasysh edhe problemet financiare të Real Madrid-it gjatë pandemisë së Covid-19, çdo ofertë mbi 50 milionë euro, do të shqyrtohet nga klubi.

Nëse është PSG-ja që i plotëson këto kërkesa, Los Blancos mund të zgjedhë të ndërtojë një marrëdhënie të fortë me klubin francez, përpara një lëvizje të mundshme të Kylian Mbappe-s. Ashtu si e Varane-s, kontrata e sulmuesit skadon në 2022.

Përshtatur për Marca nga Albanian Post

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.