Lajme

Rasti “Brezovica” – 1 muaj paraburgim ndaj ish-sekretarit të Ministrisë së Infrastrukturës


Ilustrim

Gjykata Themelore në Ferizaj, këtë të premte të 27 majit, ka caktuar masën e paraburgimit prej një muaj ndaj ish-sekretarit të Ministrisë së Infrastrukturës, Xhelil Bekteshi dhe një personit me inicialet Xh.Sh, të dyshuar në rastin “Brezovica”.

Ndërsa ndaj dy të dyshuarve të tjerë I.F dhe B.P, gjykata ka caktuar masa e sigurisë me të cilën është urdhëruar ndalimi për t`iu ofruar vendit apo personit të caktuar në kohëzgjatje prej një muaji.

Sipas gjykatës, ish-sekretari i Ministrisë dhe XH.SH., dyshohen se kanë kryer veprat penale të marrjes së ryshfetit.

Ndërsa personat me inicialet, I. F. dhe B.P., dyshohet se kanë kryer veprën penale marrje dhe dhënie të ryshfetit.

Në njoftim thuhet se gjykata ka gjetur se ekziston dyshimi i bazuar se të pandehurit kanë kryer veprat penale të lartpërmendura dhe ky dyshim i bazuar mbështet nga faktet dhe provat të cilat janë të bashkëngjitura deri në këtë fazë.

Ndryshe, katër të dyshuarit u ndaluan të enjten pas një aksioni policor, ku u bastisën 6 lokacione.

Lajmi u bë i ditur përmes një komunikate për medie nga kjo prokurori, ku thuhet se aksioni në fjalë, i cili është vazhdim i aksioneve të mëparshme në rastin “Brezovica”, është realizuar në bazë të urdhëresës së lëshuar nga Gjykata Themelore në Ferizaj për kontrollin e shtëpive dhe objekteve përcjellëse.

Prokuroria kishte njoftuar se janë kontrolluar dhe bastisur gjashtë lokacione të ndryshme dhe me vendim të prokurorit, janë ndaluar në kohëzgjatje prej 48 orësh, katër të dyshuar , në mesin e tyre edhe ish sekretari i Ministrisë së Infrastrukturës.

/Albanianpost.com


Lajmet kryesore