Misioni i OSBE-së në Kosovë të mërkurën do të publikojë një raport se si gjykatat në Kosovë e kanë trajtuar krimin e organizuar të nivelit të lartë dhe korrupsionin.

Raporti, pjesë e një programi më të gjerë të monitorimit të gjyqeve të OSBE-së në rajon, analizon 52 raste të krimit të organizuar dhe korrupsionit (përfshirë 670 seanca dëgjimore) të monitoruara nga Misioni midis 2021 dhe 2024.

Sipas njoftimit për media të OSBE-së, raporti bën rekomandime praktike për të ndihmuar institucionet në adresimin e mangësive në ndjekjen dhe gjykimin e rasteve të krimit të organizuar dhe korrupsionit.

Në këtë aktivitet do të flasin Shefi i Misionit të OSBE-së në Kosovë, ambasadori Michael Davenport, Ministrja e Drejtësisë Albulena Haxhiu, Ambasadori i BE-së në Kosovë Tomáš Szunyog, Kryetari i Gjykatës Supreme Fejzullah Rexhepi, kryesuesi i Këshillit Gjyqësor të Kosovës Albert Zogaj, Kryesuesi i Këshillit Prokurorial të Kosovës Ardian Hajdaraj dhe zëvendës Kryeprokurori Agron Qalaj.

Projekti synon të rrisë pavarësinë, cilësinë dhe efikasitetin e sistemeve gjyqësore në trajtimin e korrupsionit të rëndë dhe krimit të organizuar, dhe po realizohet në partneritet të ngushtë me – dhe me mbështetjen financiare – të Komisionit Evropian.