Raportimet se xhandarmëria serbe ka hyrë brenda territorit të Kosovës, Policia: Ishin patrulla të përbashkëta të KFOR-it me autoritetet serbe

Policia e Kosovës ka mohuar raportimet e disa mediave se gjoja xhandarmeria serbe është futur në territorin e Kosovës, konkretisht në fshatin Bervenik të Podujevës, duke thënë se janë zhvilluar patrulla të përbashkëta të KFOR-it me autoritetet policore serbe në zonën kufitare me Kosovën.

Këto raportime i ka mohuar zëdhënësi i Policisë së Kosovës, Baki Kelani, i cila ka njoftuar se me të marrë informacionin menjëherë kanë ndërmarrë veprime.

“Lidhur me informacionin e publikuar në disa media/portale, ku thuhej se një qytetar ka parë forcat serbe se kanë hyrë në territorin e Kosovës diku në zonën kufitare, në fshatin Bervenik të komunës së Podujevës, Policia e Kosovës menjëherë ka ndërmarrë veprime konkrete duke trajtuar këtë informacion”, ka thënë fillimisht Kelani.

“Bazuar në informacionet zyrtare bëhet fjalë për patrullime të përbashkëta, që KFOR me kontingjente të caktuara, realizon me autoritet policore serbe, ashtu siç realizon edhe patrullime të përbashkëta me njësitet relevante të Policisë së Kosovës”, shtoi.

Ai ka theksuar se institucioni që ai përfaqëson me njësitet relevante, vazhdon patrullimet policore në ruajtje të rendit kushtetues, ofrim të sigurisë dhe parandalim të krimit trasn-kufitar.

Ndryshe, këtë të shtune një qytetar ka postuar një fotografi në rrjetet sociale duke pretenduar se xhandarmëria serbe ka hyrë brenda territorit të Kosovës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.