Raporti i Bakoyannis që rekomandon anëtarësimin e Kosovës në KiE do të hidhet në votimin më 16 prill

Raporti i Dora Bakoyannis që rekomandon anëtarësimin e Kosovës në Këshillin e Evropës do të hidhet në votimin e Asamblesë Parlamentare të Këshillit të Evropës më 16 prill edhe pse ishte paraparë që të diskutohej dhe votohej për këtë raport më 18 prill.

Përfaqësuesja e përhershme e Serbisë në KiE, Suzana Grubjesiç, në një intervistë për Euro News Serbia ka pretenduar se data është ndryshuar ngase ekziston “frika” se më 18 do mund të mos arrihej kuorum.

“Është e qartë se ka një frikë që nuk do të kishte mjaftueshëm deputetë me votë pro në sallë më 18 prill për shkak se veçse po largohen nga Strasburgu”, tha ajo.

“Nuk kam dyshim se mund të jetë lehtësisht e realizueshme edhe për çështjen e Kosovës, pra për çështjen e përcjelljes së mëtutjeshme të opinionit të Asamblesë Parlamentare tek ministri i Komisionit, i cili i vetëm mund të vendosë për pranimin e Kosovës në Këshillin e Evropës”, shtoi.

Ndryshe, para katër dite, është miratuar në Komitetin e Asamblesë Parlamentare të Këshillit të Evropës raporti i Bakoyannis, për anëtarësimin e Kosovës në këtë organizatë.

Në raportin 26 faqesh të Bakoyannis nënvizohej fakti se Asambleja Parlamentare e KiE-së pret që Qeveria e Kosovës të ndërmarrë hapa thelbësorë dhe të prekshëm për themelimin e Asociacionit të Komunave me Shumicë Serbe sa më shpejt që të jetë e mundur.

Themelimi i Asociacionit, sipas raportit të Bakoyannis, duhet të jetë i dukshëm në rast se Kosova kërkon anëtarësimin e plotë në KiE.

“Asambleja Parlamentare pret që Qeveria e Kosovës të ndërmarrë hapa thelbësorë dhe të prekshëm me synimin për themelimin e Asociacionit sa më shpejt të jetë e mundur. Asambleja Parlamentare konsideron se themelimi i Asociacionit duhet të jetë i dukshëm në shqyrtimin e ardhshëm nga Komiteti i Ministrave të kërkesës së Kosovës për anëtarësim në Këshillin e Evropës”, thuhet në pikën e 11-të të raportit të zyrtares greke.

Raporti gjithashtu i rekomandon Këshillit të Ministrave t’i ndajë Kosovës 3 vende në Asamblenë Parlamentare.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.