![](https://albanianpost.com/wp-content/uploads/2024/06/448209795_971813898287595_4426977960272893095_n.jpg)
Ndonëse kryeministrin e Shqipërisë, Edi Ramën, nuk e takoi, Albin Kurti, të mërkurën, në 25 vjetorin e Ditës së Çlirimit të Kosovës, ka pritur në Kryeministri presidentin e Shqipërisë, Bajram Begajn.
Në një prononcim të shkurtë për media para ndërtesës së Qeverisë së Kosovës, Kurti ka potencuar se është mirënjohëse gjithmonë ndaj Shqipërisë për kontributin e dhënë në të gjitha etapat që ka kaluar vendi.
“I jemi mirënjohës Shqipërisë, për kontributin para luftës, gjatë dhe pas luftës. Presidenti i Shqipërisë Bajram Begaj, është gjithnjë i mirëseardhur. Duke qenë edhe ushtarak edhe mjek e di shumë mirë 12 qershorin 1999”, ka thënë Kurti
Në anën tjerë, Begaj ka potencuar se Dita e Çlirimit është festë e të dyja shteteve, derisa suksesi i Kosovës është edhe sukses i Shqipërisë.
“Faleminderit Kosovës për mikpritjen. Sot është dita e rilindjes se Kosovës, e vënies në vend të asaj padrejtësie shekullore që u mundësua me gjakun dhe me sakrificën e heronjve të UÇK-së. Unë dua të përgëzoj Kosovën për gjithçka që ka bërë deri me tani dhe që do të bëjë në të ardhmen” tha Begaj.
Është hera e dytë që Kryeministri i Shqipërisë, Edi Rama, vjen në Kosovë, por që homologu i tij Albin Kurti, nuk e pret në takim, derisa sipas njohësve të zhvillimeve politike dhe eksponentëve të opozitës, këto veprime të kreut të ekzekutivit kosovar po e shpërfaqin mendësinë e tij “të përçarjes së shqiptarëve”.
Të prononcuarit e Albanian Post, kanë vlerësuar se kjo qasje e Kurtit në raport me Ramën është vetëm në dëm të interesave të Kosovës, dhe asgjë tjetër.
Të hënën, Rama qëndroi në Prishtinë, pasi që mori pjesë në konferencën “Rugova dhe Perëndimi”, e organizuar nga Lidhja Demokratike e Kosovës (LDK), për nder të 25-vjetorit të çlirimit të Kosovës.
Përveç kësaj, ai u takua me presidenten Vjosa Osmani, dhe me kryetarin e Prishtinës, Përparim Rama, i cili ia dha Kryeministrit të Shqipërisë edhe çelësin e kryeqytetit, por jo me Kurtin.
E gjithë kjo, sipas nënkryetarit të LDK-së, Lutfi Haziri, ka ndodhur për shkak se në mënyrë absolute, Kurti po vazhdon të sillet “papërgjegjshëm” karshi raporteve brenda shqiptare, në veçanti me kryeministrin Rama.
Sa i përket Ramës, Haziri, në një prononcim për Albanian Post, thekson se nuk e meriton trajtimin që po ia bën Kurti, derisa shton se kryeministri shqiptar “ka një rol tjetër tanimë, dhe si kryeministër dhe si Republikë e Shqipërisë karshi zhvillimeve rajonale në Evropë Juglindore në raport me BE dhe NATO-n”.
“Fatkeqësisht Kurti vazhdon të përfaqësojë mendësinë e ndërhyrjes, përçarjes e fragmetizimit të shqiptarëve kudo që janë bashkë, për interesa të protagonizmit të tij, dhe e ka targetu Ramën si problemin e tij personal në këtë fushë”, potencon numri dy i LDK-së për AP.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com