Ramadani: Serbia synon ta eskalojë situatën në Veri që ta forcojë propagandën kundër Kosovës

Ish-kryeinspektori i Agjencisë Kosovare të Inteligjencës (AKI), Burim Ramadani, ka thënë se Serbia synon ta eskalojë situatën e sigurisë në Veri, duke tentuar kështu ta forcojë propagandën e vet kundër Kosovës me qëllim të përfitimit të aranzhmaneve të caktuara momentalisht.

Ky reagim i Ramadanit vjen pas djegies së një shtëpie në “Kodrën e Minatorëve” Veri, e cila është ndërtuar nga Qeveria e Kosovës, ku autoritetet kosovare thanë se është nxitur nga Presidenti i Serbisë, Aleksandër Vuçiç.

“Ndërsa, këto aranzhmane të shihen si të domosdoshme, por jo të mjaftueshme për të ardhmen!”, shkroi Ramadani në Facebook.

Një strategji e tillë serbe, sipas tij, nuk është e reduktuar vetëm në prodhimin e lajmeve të rrejshme dhe dezinformimit “për gjoja krizë humanitare (duke propaganduar planin e vjetër për ‘eksod’), por edhe në përdorimin e vazhdueshëm të grupeve e strukturave paralele që i organizon, financon dhe menaxhon”.

Qasja pro-aktive e Kosovës dhe prezencës ndërkombëtare këtu, në vlerësimin e ish-kryeinspektorit të AKI-së, “duhet të ketë synim zhvleftësimin e kësaj propagande”.

“Në periudhën kur propaganda serbe vlerësohet se nuk do të mund të jep asnjë efekt, edhe aktivitetet kriminale të këtyre grupeve paralele do të minimizohen deri në zhdukje”.

Tash për tash, konsideron ai, synimi serb është që të forcohet përshtypjen që gjendja në Veri është eskaluese.

“Pra, të kalohet nga vlerësime për gjendje të brishtë në gjendje eskaluese! Sulmi me molotov i natës së mbrëmshme është edhe një indikacion shtesë në këtë”, beson ai.

Mëngjesin e së martës, Ministri i Administrimit të Pushtetit Lokal, Elbert Krasniqi, ka bërë me dije se është djegur një shtëpi në “Kodrën e Minatorëve” në Veri, e cila është ndërtuar nga Qeveria e Kosovës.

Ky sulm, sipas Krasniqit, është nxitur nga Presidenti i Serbisë, Aleksandër Vuçiç.

“Ky sulm është nxitje e mosdurueshmërisë etnike e cila nxitet nga Vuçiçi i cili ka mbetur i mbyllur në propagandën e tij dhe e ka humbur kontrollin e strukturave paralele në pjesën Veriore”.

“Kjo nuk është hera e parë që ka sulme të tilla, mirëpo kjo nuk është as hera e fundit që do të ndërtohen shtëpi të reja”.

Duke dënuar këtë akt, ministri ka potencuar se veprime të tilla s’i ndalin banorët që të kthehen në pronat e tyre.

“Qeveria e Republikës së Kosovës e dënon fuqishëm këtë akt dhe as ky e asnjë sulm tjetër nuk e ndal kthimin e banorëve në pronat e tyre. Kërcënimet, shantazhet, pamfletat terroriste, nuk i frikësojnë qytetarët dhe as nuk e ndalojnë punën tonë për sigurimin e banimit të qëndrueshëm”.

Ndryshe, Qeveria e Kosovës që dy herë është duke ndarë mjete financiare për ndërtimin e shtëpive në Veri të vendit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.