Rama thjesht “pa tekst” pas kritikave të Kurtit ndaj Lajçakut: Ngritja e teorive konspirative s’është e këshillueshme

Kryeministri i Shqipërisë, Edi Rama, në një intervistë për programit shqiptar të rrjetit ndërkombëtar të lajmeve “Abc News”, ka mbetur “pa tekst” pas vargut të kritikave që kryeministri Kosovar, Albin Kurti, ka thurrur ndaj Përfaqësuesit Special të Bashkimit Evropian (BE) për dialogun Kosovë-Serbi, Miroslav Lajçak, duke e pozicionuar në anën e Serbisë e kundër Kosovës.

Kreu i ekzekutivit kosovar në një konferencë për media në Prishtinë, ka flirtuar me teorinë e konspiracionit dhe komplotit. Ai ka thënë se ekziston një skenar, i hartuar nga diplomati sllovak dhe presidenti i Serbisë, Aleksandër Vuçiç, për të dëmtuar të ardhmen e Kosovës në procesin e mëtejmë të dialogut për normalizimin e marrëdhënieve.

E kryeministri shqiptar ka vlerësuar se kritikan ndaj përfaqësuesit evropian vetëm sa i dëmtojnë edhe më tej raportet e Kosovës me pjesën tjetër të bashkësisë së organizuar ndërkombëtare, ndërsa ka shtuar se “teoritë e konspiracionit” nuk janë fort të këshillueshme për t’u ngritur, megjithëse nuk ka asnjë pikë dyshimi se kryeministri Kurti e dëshiron më të mirën për Kosovën.

“Janë gjëra që të lënë pa tekst dhe janë gjëra që dëmtojnë edhe më shumë atë që pretendohet se po përpiqen të riparojnë, sepse të ngresh një teori konspiracioni për një bashkëpunim që e zbulove mes Serbisë dhe të dërguarit special të gjithë BE nuk është diçka e këshillueshme për t’u bërë”, ka deklaruar kryeministri Rama të enjten.

“Po e përsëris, unë nuk dyshoj në dëshirën e madhe dhe të mirë të Albinit për të bërë më të mirën për Kosovën, por dëshira e madhe dhe vullneti i mirë nuk mjaftojnë asnjëherë. Duhet qartësia strategjike, për të arritur qëllimin, gjë që nuk e shoh”, ka shtuar kreu i ekzekutivit shqiptar.

BE-ja megjithatë i ka konsideruar “akuza të pabaza” pretendimet e autoriteteve kosovare për njënashmërinë e Lajçakut, ndërsa bashkësia e organizuar ndërkombëtare ka bërë me dije se pavarësisht këtyre “akuzave të pabaza”, terreni i kërkimit të madh për “shkakun e vetëm” dhe “formulën e zgjidhjes” vazhdon të mbetet Brukseli.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.