Rama: Shqipëria 2030 kampione edhe në arsim

Synimi ynë është që Shqipëria 2030 të jetë kampione në rajon në të gjithë aspektet dhe të anëtarësohet në Bashkimin Evropian.

Kështu deklaroi kryeministri i Shqipërisë, Edi Rama, nga takimi i organizuar në shkollën “Kosova” në Tiranë” lidhur me sigurinë.

Për kryeministrin viti i ri shkollor nisi me një tjetër grup shkollash të reja të cilat, i shtohen një tërësie godinash arsimore.

“Përtej kësaj ne nuk jemi fokusuar vetëm te godina e infrastruktura, por në mënyrë të posaçme dhe te fuqizimi i autoritetit të mësuesit dhe motivimi i vazhdueshëm i trupës mësimore”.

Këtë, shtoi numri një i Qeverisë, e kemi bërë me të gjitha mënyrat e nevojshme.

“Sot kemi arritur me ndërhyrjen e fundit të muajit qershor që pagën mesatare të mësuesve ta kemi 950 euro”.

Ndërkohë, ministri i Brendshëm, Ervin Hoxha, ka ravijëzuar rëndësinë që ka siguria në shkolla dhe angazhimin për t’u krijuar nxënësve dhe mësuesve një mjedis ku ata të ndjehen të mbrojtur dhe të sigurt.

Ai ka renditur masat kryesore të ndërmarra, si rrjedhojë e nismës “Paketa e Sigurisë në Shkolla”.

Po ashtu ka prezantuar dhe një nga projektet më madhorë të “Shqipërisë 2030”, në aspektin e sigurisë.

“Përmes ‘Smart City’ synojmë një standard të ri në monitorimin, kontrollin, mbikëqyrjen dhe analizimin e pamjeve të rrugëve, hapësirave të mëdha publike, qyteteve, përfshirë këtu edhe shkollat. Ky projekt do të modernizojë edhe më tej infrastrukturën teknologjike të Policisë së Shtetit”, ka shtuar ai.

Sipas ministrit, “240 Oficerë të Sigurisë, janë ura lidhëse mes Ministrisë së Brendshme dhe asaj të Arsimit, ‘syri dhe veshi’ i policisë në shkolla, janë një hallkë e pazëvendësueshme dhe vlerë e shtuar në sigurinë e nxënësve”.

Që në fillim të këtij viti shkollor, ai ka bërë me dije se ka kërkuar po ashtu një qasje tjetër, me fokus menaxhimin e trafikut dhe përmirësimin e sinjalistikës rrugore.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.