Rama: Prishtina ka nevojë për një qendër që përkrahë personat me sindromën Down

Kryetari i Prishtinës, Përparim Rama ka thënë se personat me sindromën Down dhe Autizëm duhet të kenë një qendër adekuate për integrim dhe përkrahjen e këtyre personave.

“Prishtinës i nevojitet një qendër adekuate e integruar për përkrahjen e personave me sindromën Down dhe autizëm”.

I pari i Prishtinës, këto komente i bëri gjatë vizitës në objektin e përcaktuar për ndërtimin e Qendrës për Down Syndrome dhe Autizëm.

“Së bashku me ekipin e Komunës, organizuam një vizitë për të përcjellë ecurinë e punës në objektin e përcaktuar për ndërtimin e ‘Qendrës për Doën Syndrome dhe Autizëm”, ka shkruar Rama në rrjetin social ‘Facebook’.

Më 4 shkurt, ministrja e Arsimit, Shkencës dhe Teknologjisë dhe Inovacionit (MASHTI), Arbërie Nagavci ka kërkuar nga komunat që të punësojnë asistentë në ndihmë të nxënësve që kanë vështirësi në adaptim dhe mësimnxënie, me buxhetin që është ndarë për këtë punë.

Ajo përmes një postimi në rrjetin social ‘Facebook’, ka thënë se MASHTI ka ndarë buxhetin për punësimin e asistentëve, por që Komuna e Prishtinës nuk e ka bërë një gjë të tillë.

“Komuna e Prishtinës e ka pasur të lejuar punësimin e 12 asistentëve dhe detyra e tyre ka qenë pikërisht mbështetja e nxënësve me aftësi të kufizuara që kanë vështirësi në adoptim dhe mësimnxënie. Fatkeqësisht, Komuna e Prishtinës nuk i ka punësuar këta asistentë”, ka shkruar Nagavci.

Ajo ka garantuar mbështetje në cilindo rast ku shkelet e drejtave e nxënësve të shkollave.

“MASHTI në kuadër të sigurimit të mekanizmit të mbështetjes se shkollës dhe fëmijëve me aftësi të kufizuara ka ndarë mjetet dhe buxhetin për punësimin e asistenteve, Komuna e Prishtinës e ka pasur të lejuar punësimin e 12 asistentëve dhe detyra e tyre ka qenë pikërisht mbështetja e nxënësve me aftësi të kufizuara që kanë vështirësi në adoptim dhe mësimnxënie”.

Reagimi i ministres së Arsimit, Arbërie Nagavci ka ardhur pas raportimeve se një 8-vjeçare me autizëm është larguar nga shkolla “Elena Gjika”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.