Pas përfundimit të mbledhjes me krerët e degëve të Partisë Socialiste, kryeministri i Shqipërisë, Edi Rama, pranoi për herë të parë se do të ulet në tryezë me opozitën – për vetting-un e politikanëve.
“Do të ulemi në tryezë, do të japim gjithë disponimin për të dëgjuar, do dëgjojmë, do themi ato që mendojmë, do marrim mendimet e ekspertëve tanë të fushës dhe do arrijmë në konkluzione në mënyrë sa më civile”, theksoi fillimisht Rama nga selia rozë, të mërkurën e 27 tetorit.
Ai nënvizoi se kjo është një qasje e kahershme e tij, që flet për cilësinë e demokracisë së një vendi.
“Nuk varet se sa shpesh biem dakord, por mënyra se si biem dakord”, shtoi kryeministri në fjalën e tij.
Ndër të tjera, ai ravijëzoi se është i hapur për të diskutuar çdo gjë, pa paragjykuar asgjë.
“Mund të mos biem dakord për diçka, nuk e kam fjalën për rastin konkret, por nëse shohim interes për publikun, vendim, s’ka rëndësi se nga vjen propozimi, nëse nuk shohim interes nuk e pranojmë”, tha më tej Rama.
Komisioni hetimor për mbetjet
Lidhur me miratimin e komisionit hetimor për mbetjet, e cila është planifikuar për seancën plenare të 28 tetorit, kryeministri u shpreh se nuk “ka dëgjuar të ketë ndonjë kundër”.
“Besoj se do të votohet”, u shpreh numri një i qeverisë shqiptare.
Komisioni hetimor për zgjedhjet e 25 prillit
Sa i takon ngritjes së një komisioni hetimor për zgjedhjet e 25 prillit, Rama deklaroi se nuk ka pasur asnjë ftesë në drejtim të tij.
“Jam në dispozicion”, përsëriti kryeministri, “për të gjitha gjërat që do të më kërkohet për gjërat që kam për të thënë, ai është një komision që është ngritur me kërkesë të opozitës”.
Komisioni hetimor për zgjedhjet, i ngritur me kërkesë të Partisë Demokratike, nisi punën të hënën e 18 tetorit.
Kryetar i komisionit, Enkelejd Alibeaj, deputeti i PD-së, njoftoi se afati i komisionit është tremujor.
Ndër të tjera, komisioni hetimor do të thërrasë për të dëshmuar 24 funksionarë publikë. Ata do të japin sqarime, në lidhje me disa pika të përcaktuara nga komisioni i drejtuar nga demokratët.
Në këtë listë janë edhe emrat: kryeministri Edi Rama, zëvendëskryeministri Arben Ahmetaj, ministri i Brendshëm Bledi Çuçi, kreu i SPAK-ut, Arben Kraja, drejtuesi dhe ish-drejtuesi i policisë së Shtetit, përkatësisht Gledis Nano dhe Ardi Veliu.
Mbi helmimin masiv në Krujë
Kryeministri Edi Rama, gjatë deklaratës para mediave, ka reaguar për herë të parë edhe pas situatës së krijuar në Krujë, ku mbetën të helmuar mbi 500 banorë nga uji i pijshëm.
Ai vuri theksin te fakti se “qeveria ka bërë investimin” dhe se ndërmarrja për mirëmbajtjen është përgjegjëse për të.
“Të bësh investimin dhe të sigurosh që uji është në parametrat e duhura janë dy gjëra të ndryshme. Qeveria ka bërë investimin për sistemin e ri. Ndërmarrja ka përgjegjësitë e saj”, tha ai.Megjithatë, fjala u takon organeve të drejtësisë, konkretisht Prokurorisë së Krujës.
Ky organ ka urdhëruar ekspertim mjeko-ligjor të menjëhershëm, për të përcaktuar se cili ka qenë shkaku i helmimit të banorëve.
Gjithashtu, në njoftimin zyrtar të saj bëhet me dije se po kryhen analizat fiziko-kimike dhe bakteriale të ujit të pijshëm që furnizon qytetin e Krujës, si dhe veprime të tjera hetimore për zbardhjen e të gjitha rrethanave në lidhje me këtë ngjarje.
Mbi shpalljen e kandidaturës së Berishës për postin e kreut të PD-së
Pyetjes së gazetarëve mbi situatën e Partisë Demokratike, pas shpalljes së kandidaturës për postin e kreut në këtë parti nga ana e ish-liderit historik të demokratëve, Sali Berisha, Rama e përshkroi si përmbledhja me seri e një pjese humoristike dhe satirike.
Nga foltorja e radhës në Kavajë, Berisha ka shpallur kandidaturën e tij për postin e kryetarit të Partisë Demokratike.
“Natyrisht që do hapim një garë, në të cilën garantoj se çdo njeri që do hyjë në atë garë, do ketë një garë të lirë. Natyrisht, njëri prej tyre do të jetë dhe Sali Berisha”, vetëdeklaroi Berisha.
Më pas, ai u bëri thirrje demokratëve që të mbledhin firmat për mbajtjen e Kuvendit Kombëtar të PD-së.
PD-ja, sipas Ramës, është kthyer në një “riparaqitje të humorit të zi”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
