Rama për Bashkëqeverisjen: Në vitin 2022 mbyllen sportelet, shërbimet vetëm online

“Plani ynë qeverisës është mbyllja e të gjithë sporteleve deri në vitin 2022. Shërbimet do të kryhen të gjitha online, pa pasur nevojë të trokitet në zyra”.

Kështu është shprehur kryeministri i Shqipërisë, Edi Rama, gjatë një takimi sensibilizues për platformën e Bashkëqeverisjes në qytetin e Elbasanit.

“Teksa ligji bëhet gati të hyjë në fuqi, duke e kthyer bashkëqeverisjen në një detyrues ligjor, ne u japim qytetarëve një instrument mjaft të rëndësishëm. Kjo pasi një nga problematikat që ne hasim, është problemi i marrëdhënieve të qytetarëve me administratën dhe anasjelltas”.

Pavarësisht se ligji është kthyer nga Presidenti i Republikës, Ilir Meta, Rama theksoi se do të miratohet ashtu siç është nga Parlamenti.

Nga Elbasani, Rama bëri të ditur se për çdo kërkesë që qytetari nuk ka marrë përgjigje nga administrata, punonjësi përgjegjës do të sanksionohet financiarisht, përveç asaj administrativisht.

“Platforma bën të mundur që çdo mosveprim nga ana e administratës dhe mos reagim në kohë të lërë gjurmën e vet. Por, nëse deri dje kjo ishte një çështje, e cila i mbetej thjesht qytetarit nëse ankohej apo jo, kjo është një çështje që menjëherë sot vë në punë mekanizmin e kontrollit”, bëri me dije kryeministri.

Më tej ai tha se tashmë procesi i legalizimit të pronës do të kryhet “vetëm online”. E gjitha kjo për të mënjanuar burokracitë dhe proceset e pritjes.

“Një nga shërbimet më problematike në Shqipëri është ai i pronës, legalizimet dhe marrja e titullit të pronësisë. Çdokush mund të bëjë aplikimin për të marrë këtë titull pa shkuar te kadastra dhe në bazë të afatit të presin përgjigje”, ravijëzoi Rama.

Më tej, numri një i qeverisë shqiptare tha se, “sot 1 mijë e 209 shërbime mund të merren nga mjeti celular ‘smartphone’ ose kompjuter”.

“Të gjitha këto janë 95% e shërbimeve publike dhe kjo do të thotë se nuk është e nevojshme për të shkuar në asnjë zyrë. Mbi të gjitha nuk është e nevojshme të njohim asnjë njeri për të na kryer shërbimin”, tha Rama, duke iu drejtuar qytetarëve.

Gjithashtu Rama tha se, falë nënshkrimit elektronik, qytetarët mund të disponojnë 50 dokumente të nevojshëm, të cilat mund shkarkohen nga kompjuteri ose nga celulari me vulë elektronike.

Ndër të tjera, Rama tha se çdo dokumentacion, i cili gjendet në zyrat e shtetit, qytetari nuk ka nevojë të plotësojë vetë dokumentacion për licencë, mjafton kërkesa dhe pjesa tjetër do të kryhet nga personat përgjegjës.

Nga ana tjetër, drejtoresha e Agjencisë Kombëtare të Shoqërisë së Informacionit, Linda Karçanaj, iu drejtua qytetarëve se, “3 mijë e 200 persona nuk shkojnë më në sportele, por aplikojnë online. 17 milionë transaksione kryhen nga kjo platformë çdo muaj”.

Më tej, ajo shtoi se qytetarët kanë kursyer 6.5 milionë euro që prej marrjes së shërbimeve online, të cilat nuk kanë nevojë për pagesë.

Rama e mbylli fjalimin duke thënë se, “Shqipëria po shkon drejt digjitalizimit të shërbimeve”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.