Rama paralajmëron vizitën e presidentit të EBA-s në Tiranë

Kryeministri i Shqipërisë, Edi Rama ka paralajmëruar një vizitë në Tiranë të Presidentit të Emirateve të Bashkuara Arabe (EBA), Sheikh Mohamed Bin Zayed Al Nayan, e cila do të ishte e para e këtij niveli në vendin tonë.

Lajmi u bë i ditur nga kreu i Qeverisë pas takimit me kryediplomatin e EBA-s, Sheikh Abdullah Bin Zayed Bin Sultan Al Nahyan.

“New York – Me Ministrin e Jashtëm të Emirateve të Bashkuara Arabe, mikun e çmuar Sheikh Abdullah Bin Zayed Bin Sultan Al Nahyan, folëm për finalizimin e paketës së investimeve në Shqipëri, si edhe për vizitën në Tiranë të Presidentit të EBA, Sheikh Mohamed Bin Zayed Al Nayan, e para e këtij niveli në vendin tonë”, shkruan Rama në median sociale “Facebook”.

Kujtojmë që, kryeministri shqiptar ka mbërritur në New York në kuadër të punimeve të Asamblesë së Përgjithshme të OKB-së dhe takimit të hapur të Këshillit të Sigurimit, i cili do të drejtohet nga Presidenca shqiptare për herë të dytë gjatë mandatit të saj historik.

Kreu i Qeverisë publikoi më herët angazhimin e parë diplomatik gjatë takimit me ministrin e Jashtëm britanik, James Cleverly.

Në takim ishte pjesëmarrës edhe ministri për Evropën dhe Punët e Jashtme, Igli Hasani dhe ambasadori shqiptar Ferit Hoxha, në cilësinë tanimë të presidentit të Këshillit të Sigurimit të OKB-së.

Ndërtimi i situatës

Kryediplomati shqiptar Igli Hasani, deklaroi më herët se agjenda e vendit është plotësisht në përputhje me Objektivat e Zhvillimit të Qëndrueshëm (SDG) të OKB-së.

Lajmi u bë i ditur gjatë nisjes së Samitit javor të Objektivave të Zhvillimit të Qëndrueshëm në New York.

Në Eventin e SDG-së, Ministri i Jashtëm Igli Hasani rikonfirmoi angazhimin e Shqipërisë për zbatimin e Përshpejtuesit Global për Punë të Denjë dhe Mbrojtje Sociale për Tranzicione të Drejta, njoftoi MEPJ-ja shqiptare.

“Axhenda e Strategjisë Kombëtare për Zhvillim dhe Integrim Evropian (SKZHIE) e Shqipërisë është plotësisht në përputhje me SDG 2030 që mbështet trajnimin dhe punësimin afatgjatë, veçanërisht për gratë, të rinjtë dhe grupet e cenueshme”, shtoi Hasani.

Sipas tij, Qeveria është plotësisht e përkushtuar për të krijuar ekonomi të qëndrueshme dhe miqësore me vendet e punës përmes konsensusit social.

Zyrtari ravijëzoi se Shqipëria pret të bashkëpunojë me partnerë ndërkombëtarë, duke ndarë përvojat dhe duke kontribuar në përpjekjet kolektive për të promovuar punë cilësore dhe mbrojtje sociale.

Çfarë pritet nga Asambleja e Përgjithshme e OKB-së

Disa takime të nivelit të lartë që pritet të ndodhin gjatë Asamblesë së Përgjithshme fokusohen në prioritetet e vendeve në zhvillim në Afrikë, Amerikën Latine dhe Azi: klima, shëndeti, financimi për zhvillimin dhe si të arrihen Objektivat e Zhvillimit të Qëndrueshëm (SDG) – një listë globale “për të bërë” e krijuar në 2015 – në rrugën e duhur.

Vëmendja e njerëzve në UNGA këtë vit do të jetë po ashtu te samiti shumë i rëndësishëm për SDG-të.

I mbajtur vetëm një herë në katër vjet, Samiti i këtij viti shënon gjysmën e rrugës deri në afatin 2030 për zbatimin e Objektivave të Zhvillimit të Qëndrueshëm (SDG).

Kombet e Bashkuara kanë thënë se vetëm 15 për qind e objektivave të SDG-ve janë në rrugën e duhur, duke u bërë thirrje aktorëve kyç për të shpëtuar qëllimet.

Sekretari i Përgjithshëm i OKB-së, António Guterres, në hapjen e Fundjavës së Veprimit për SDG në selinë e OKB-së në New York të shtunën, u bëri thirrje aktorëve të shoqërisë civile që të përdorin zërat e tyre pasionante dhe rrjetet e tyre energjike bazë për të ndihmuar në shpëtimin e SDG-ve.

Samiti, i planifikuar të mbahet të hënën dhe të martën, nga 18 deri më 19 shtator, do të shënojë pikën e mesit të SDG-ve, midis fillimit të tyre në 2015 dhe afatit të tyre 2030.

Qëllimet e premtuara nga vendet anëtare të OKB-së kur miratuan 2030-ën për të “të mos lënë askënd prapa” nuk janë arritur ende, pavarësisht disa përparimeve.

Java më e madhe diplomatike e vitit

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.