Rama i përgjigjet qytetarëve: Energjia problem real, për gazin po bashkëpunojmë me Amerikën

Kryeministri i Shqipërisë, Edi Rama, nëpërmjet një videomesazhi në Facebook, i është përgjigjur pyetjeve të qytetarëve në media sociale, mbi problemet e fundit të krizës energjetike dhe dyshimet që ata kanë mbi situatën e krijuar.

Kreu i Qeverisë, ka sqaruar se Shqipëria nuk është një vend që prodhon energji gjithnjë për të përmbushur nevojat e saj. Sipas tij, vetëm kur ka rreshje të mjaftueshme, vendi është i aftë të përballojë nevojat.

Në të kundërt, Qeveria është e detyruar të blejë energjinë elektrike në tregun ndërkombëtar. “Aty, çmimet nuk vendosen nga ne, por nga bursa, nga kërkesa dhe oferta mbi mallin”, ka sqaruar Rama.

Ato gjithashtu, për shkak se bëjnë pjesë në tregun e lirë, nuk bëjnë krahasim çmimi në bazë të rrogave.

Mbi një përhapje të mundshme paniku, Rama ka ravijëzuar se gjithçka ai bëri, ishte të informonte mbi influencën e çmimeve të energjisë në gjithë botën.

Nafta dhe rritja ekonomike

Për naftën, çështja është e ngjashme. Përtej prodhimit të saj në nivelin bruto, Shqipëria ka një naftë që cilësohet si e rëndë. Për këtë fakt, ajo shkon më shumë drejt sektorëve të përpunimit të bitumit më së shumti.

Gasoili dhe benzina që përdoren për mjetet, detyrimisht, duhet të vijë nga importi. Edhe aty, kontraktimi është privat, ndaj nuk e cakton Qeveria çmimin.

“Kemi zgjedhur vetë vite më parë të jemi në lirinë e tregut”, vijoi Rama. “Çmimet i cakton raporti kërkesë ofertë, jo shteti”.

Mbi konsumin e gazit, Rama pohoi se Shqipëria po bashkëpunon me SHBA-të, për futjen e gazit të lëngshëm në Shqipëri. Kjo do të mundësojë edhe një kalim të mundshëm në të ardhmen të TEC-it të Vlorës, me lëndë përpunuese gazin. Kështu, duke minimizuar varjen nga klima dhe natyra për prodhimin e energjisë.

Kryeministri u ndal të fliste edhe për rrogat dhe rritjen ekonomike. Disa qytetarë në pyetjet e tyre, shtronin çështjen se pse ekonomia është rritur me 18% por rrogat jo.

Kryeministri shpjegoi se rritja e rrogave nuk varet nga një rritje e tillë e ekonomisë. Për më tepër, rritha 18% e tanishme nuk është krahasuar me çfarë ishte ekonomia më parë, por me çfarë ishte pas pandemisë.

“Sikur rrogat të ngrihet me sustë dhe jo me punë, vendet e pasura do t’i bënin nga 20 mijë euro për person. Ato nuk rriten sipas dëshirës por sipas kapaciteteve ekonomike”, clësoi ai.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.