Shqipëria

Rama i kundërpërgjigjet Sofjes zyrtare: Ose hiqni veto-n, ose më duroni


Kryeministri i Shqipërisë, Edi Rama, i është kundërpërgjigjur Ministrisë së Jashtme Bullgare, duke i bërë thirrje që “ose të heqë veto-n, ose ta durojë”.

“Me qetësi miq: Hiqni VETO-n, ose më duroni mua!”, u përgjigj Rama përmes një statusi në Twitter.

Ballafaqimi i 24 qershorit mes palëve erdhi pas deklaratave të kryeministrit shqiptar në samitin BE-Ballkani Perëndimor.

Ai e quajti “një turp”, faktin që, një vend i NATO-s si Bullgaria, rrëmben dy vende të tjera të NATO-s, pikërisht Shqipërinë dhe Maqedoninë e Veriut.

Kjo, në mes të një lufte të nxehtë në oborrin e pasmë të Evropës.

“Ju jeni një rrëmujë, jeni një turp”, u adresua Rama para mediave.

Në reagimin e tij në median sociale, kreu i qeverisë shqiptare sqaron se edhe ai ka një problem me Bullgarinë.

“Ministria e Jashtme e Bullgarisë ka një problem me mënyrën time të të folurit! Mjaft e drejtë. Edhe unë kam një problem me mënyrën se si Bullgaria dëshiron të zgjidhë çështjet biletarale duke përdorur procesin e zgjerimit si mjet për rrëmbimin e dy vendeve të NATO-s!”, shton Rama në statusin e tij.

Në përmbyllje, kryeministri i kujton një bashkëpunim të suksesshëm autoriteteve bullgare.

“Më lejoni t’ju kujtoj të dashur miq bullgarë se u desh një telefonatë e shkurtër me Boyko Borissov (Kryetari i GERB – AP) për të zgjidhur miqësisht dhe sinqerisht çështjen e minoritetit bullgar në Shqipëri!”, nënvizoi ai.

Rama u shpreh në përmbyllje se “miqtë e vërtetë nuk e dëmtojnë njëri-tjetrin, por flasin sinqerisht me njëri-tjetrin dhe ata bashkëpunojnë”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore