Rama: Fluturimi i parë në Aeroportin e Vlorës, në verën e vitit 2025

Kryeministri i Shqipërisë, Edi Rama ka shtyrë me disa muaj parashikimin e fluturimit përurues në Aeroportin e Vlorës.

Në nëntor të vitit të kaluar, numri një i Qeverisë deklaroi se fluturimi i parë në Aeroportin e Vlorës pritej të bëhej në fund të vitit 2024, por tanimë synohet sezoni veror i vitit 2025.

Lajmi u bë i ditur nga kreu i Qeverisë, duke cituar statusin e tij në median sociale “Facebook”.

“Në Aeroportin e Ri Ndërkombëtar të Vlorës ka marrë formë e gjithë gjurma e pistës, e ku punohet me ritëm të lartë me synimin për të ulur avionin e parë në verën e vitit 2025, kur Shqipëria Turistike do të hyjë në fazën tjetër drejt marrjes së vendit kampion në Ballkan për turizmin brenda kësaj dekade”, shkruan Rama.

Aeroporti i Vlorës do të jetë aeroporti më i madh në Ballkan, duke qenë kështu një ndër investimet më të rëndësishme për ekonominë e vendit.

Kështu deklaronte ministrja e Infrastrukturës dhe Energjisë, Belinda Balluku, teksa inspektonte rrugën, e cila do të lidhë aeroportin ndërkombëtar të Vlorës me autostradën Fier-Vlorë.

“Aeroporti do jetë më i madhi në Ballkan, i kategorisë 4E dhe i jep gjithë rajonit një mundësi të re për të akesuar pa përdorur hub-et. Maqedonia e Veriut, Mali i Zi, sigurisht Shqipëria dhe Kosova nuk kanë më nevojë për hub-e të fluturojnë në kontinente të tjera dhe këtë do e ofrojë Vlora”.

Për të, aeroporti jo vetëm që do ndikojë ekonominë shqiptare dhe turizmin, por do ndikojë edhe atë rajonal.

Aeroporti i Vlorës ndryshon lojën – miliona pushues britanikë do të dynden së shpejti në Shqipëri

Më në detaje

Sipërmarrësi shqiptar Behgjet Pacolli do të pohonte në prill të vitit 2022 se “Aeroporti Ndërkombëtar i Vlorës” do të krahasohet me aeroportet më të mëdhenj në botë.

Madje, Pacolli garantoi se i njëjti standard për ndërtimin e tij po aplikohet në aeroportin e New York-ut.

Aeroporti i Vlorës do të klasifikohet në kategorinë IV, sqaroi më tej Pacolli.

Aeroportet e klasit IV janë ato aeroporte që shërbejnë vetëm për operacione të paplanifikuara të avionëve të mëdhenj transportues ajror.

Sipas tij, ana financiare është pothuajse e përkryer dhe mbeten vetëm disa detaje sa i takon infrastrukturës rrugore.

Aeroporti

Zyrtarja shqiptare, sakaq, theksoi se zona ku po ndërtohet, nuk është lagunore, por i përket një hapësire të vjetër ajrore.

Balluku nënvizoi se janë marrë të gjitha lejet mjedisore, sipas standardeve të BE-së, duke qenë se ka pasur kontestime të forta nga ana e shoqërisë civile dhe organizatave mjedisore.

Ministrja shtoi se ky aeroport do të jetë i vetëmjaftueshëm nga aspekti energjetik, pasi do të jetë i mbuluar nga panelet diellore.

Pra, do të gjenerohet rreth 5.3 MWh, e cila përkon me sasinë që do t’i duhet aeroportit për të operuar në kapacitetet e saj.

“Jemi në pikën ku të gjitha projektet janë gati të aprovuara. Kemi filluar me aprovimin e nënkontraktorëve”, ravijëzoi në vijim të bashkëbisedimit Pacolli.

Sipërmarrësi premtoi se brenda vitit do të bëhet mbushja e gjithë territorit (2 milionë metër kub mbushje) dhe konstruksioni metalik i të gjitha ndërtesave (vëllim prej 38 mijë metra katrorë).

Së bashku me ministren shqiptare, ai tregoi se në këtë moment të projektit dominojnë makineritë, por do të ketë lëvizje qarkore (100 kamiona në ditë) me 600 deri në 700 punëtorë.

Në përmbyllje, kryeministri rezervoi një batutë për Pacollin, duke i sjellë në vëmendje se “ka ndërtuar gjysmën e Kazakistanit”.

“Ke ndërtuar gjysmën e Kazakistanit atje, këtu do të thonë erdhi Behgjet Pacolli nga Prishtina i bëri Vlorës aeroport”, iu drejtua Rama-sipërmarrësit.

Kujtojmë që ky aeroport do të jetë edhe më i madhi në Shqipëri, duke lënë pas atë të Rinasit.

Përurimi i punimeve u bë më 28 nëntor të vitit 2021 dhe kompania fituese, e cila do të zhvillojë punimet është “Mabetex Group”, e themeluar nga Pacolli.

Çfarë ndodhi më 28 nëntor?

“Me në krye bacën Behgjet njoftojmë zyrtarisht nisjen e punimeve për ndërtimin e Aeroportit Ndërkombëtar të Vlorës”.

Kështu u shpreh kryeministri Rama, paraditen e 28 nëntorit 2021 në ceremoninë e nisjes së punimeve për këtë aeroport.

Të pranishëm, përveç kryeministrit, ishte edhe ministrja Balluku dhe sipërmarrësi Behgjet Pacolli.

Kompania e këtij të fundit – konsorciumi “Mabco Construction”, “Mabetex Group” – u shpall fitues më 5 mars 2021 për ndërtimin e aeroportit.

Si Rama, edhe Balluku falënderuan Pacollin për gjithë mundësitë që do t’i hapë qytetit të Vlorës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.