Qeveria shqiptare do të hyjë në administrimin e furnizimit të naftës

Brenda 24 orëve do të miratohet një akt normativ dhe qeveria shqiptare do të hyjë në administrimin e furnizimit bashkë me furnitorët e naftës.

Kjo, përmes një bordi kombëtar të furnizimit me karburant.

Ishte kjo deklarata e kryeministrit të Shqipërisë, Edi Rama para furnizuesve të naftës.

Rama gjendej në praninë e ministres së Infrastrukturës dhe Energjisë, Belinda Balluku dhe ministres së Financave dhe Ekonomisë, Delina Ibrahimaj.

Ai shtoi se furnizuesit duhet të bëjnë një sakrificë në këtë moment lufte.

“Kjo nuk është koha për të fituar, por është koha për të rezistuar”, u shpreh Rama fillimisht.

Apeli 

Thirrja e Ramës ndaj furnizuesve të naftës ishte që duhet të bashkohen të dyja palët në fakte.

“Ne mund të jemi të ndarë në opinione por të bashkuar në fakte”, vijoi kreu i qeverisë.

Fakti, sipas kryeministrit, është që lufta ka ardhur në Shqipëri me faturën e çmimit të energjisë, të naftës dhe me ndikimin në të gjitha çmimet.

“Luftën nuk e kemi nisur ne dhe nuk e përfundojmë dot ne”, shtoi Rama.

Ai kujtoi se kriza më e rëndë është ajo e energjisë, e cila konsiderohet si “pandemia e re”.

“Tani jemi në zemër të krizës dhe qeveria shqiptare po krijon një mburojë që goditja e krizës të mos bjerë mbi famijet dhe biznesin e vogël”, theksoi kryeministri shqiptar.

Rama deklaroi se është shumë e rëndësishme që të gjithë duhet të jenë të vetëdijshëm se “kush ka më shumë mundësi do të mbajë më shumë barrë”.

Kjo, referuar atyre që kanë një makinë dhe atyre që s’kanë.

“Ne do të shohim se si të kompensojmë fermerët”, shtoi Rama.

Paralajmërimi

Ai paralajmëroi në përmbyllje se do të ketë masa deri në mbyllje për abuzuesit me çmimet.

“Nuk do të ketë asnjë tabelë në çdo pikë karburanti ku do të shfaqet një çmim pa u aprovuar nga bordi, kush e bën do të humbasë karburantin”, deklaroi më tej Rama.

Referuar këtij vendimi, kryeministri ka sqaruar se “është luftë”.

“Nuk jam ideolog i tregut të lirë apo shtetit si fuqi diktuese në ekonomi, por thjesht e vetëm mendoj që liria ekonomike është themelore”, shtoi kreu i qeverisë shqiptare.

Rama sqaroi se përfaqësuesit e qeverisë shqiptare dhe ministrja e Financave dhe e Infrastrukturës dhe Energjisë, drejtori i Doganave dhe kryetari i Autoritetit të Konkurrencës do të jenë në një tavolinë me pesë përfaqësues nga furnizuesit.

Këta të fundit do të përzgjidhen nga vetë furnizuesit dhe në përmbyllje bordi pas takimit me ta do caktojë çmimin e naftës që do të qëndrojë në tabela.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.