Për kryeministrin shqiptar, Edi Rama, një vit i dytë 1997 është shmangur mrekullisht në Shqipëri për t’u përsëritur në një herë të dytë këtë dekadë dhe vetëm një emër e ka bërë të munguar këtë shmangie: Partia Socialiste.
Kështu ka komentuar ai gjatë fjalës në Kongresin e PS-së, mbajtur në ditën e Rinisë, më 8 dhjetor, ku Rama bëri edhe bilancin e “dekadës socialiste”.
Sipas tij, kjo dekadë e qeverisjes socialiste ka pasur shumë sprova, mes të cilave tre madhore, që lidhen me tërmetin e 26 nëntorit 2019, pandemisë COVID-19, por edhe krizës së luftës në Ukrainë.
“Imagjinoni”, përshkroi Rama, “nëse do të kishte Shqipëria ende borxhet e trashëguara nga viti 2013, spitalet e dikurshme, apo gjysmën e popullatës, e cila nuk paguante për energjinë elektrike”.
Kështu, duke përmendur se ka qenë pikërisht PS-ja, ajo e cila ka bërë të mundur reforma të qenësishme për vendin, i cili sot pret 10 milionë turistë, teksa në të shkuar pak e njihnin dhe akoma më pak flisnin për të.
Për Ramën, janë tre kolona kryesore, aty ku duhet të shtrihet vëmendja: Rrugëtimi drejt Bashkimit Evropian, modernizimi i vendit dhe një Qeveri e përkushtuar ndaj kapitalit.
Është e vërtetë, sipas kryeministrit, se socialistët do të vijojnë të investojnë në infrastrukturë, të bëjnë më shumë për turizmin, për ekonomi.
Por, pa një drejtësi dhe pa një mirëqeverisje evropiane, nuk ka anëtarësim në Bashkimin Evropian!
Integrimi në BE
Kryeministri i Shqipërisë, Edi Rama, nuk e ka të qartë nëse Greqia do të vendosë apo jo veto ndaj vendit për integrimin evropian, lidhur me rastin Beleri, por e ka të sigurt se nga Brukseli, javën e ardhshme, ai do të kthehet me kokën lart dhe krenar për gjithë reformat.
Sipas Ramës, të gjitha vendet e Bashkimit Evropian, e kanë të qartë qëndrimin e tyre për Shqipërinë dhe e kanë gati mendimin dhe vendimin për të hapur kapitujt e parë negociues.
Greqia, është i vetmi vend që ende nuk e ka të qartë këtë qëndrim dhe vetoja nuk është e përjashtuar.
Por, në atë që është i sigurt Rama, është fakti se Tirana zyrtare i ka kryer detyrat si duhet dhe ai nuk mundet përveçse të kthehet me kokën lart nga Brukseli, pas takimit që do të mbahet atje.
Lidhur me kohën e anëtarësimit, ai ka treguar optimizëm për afatet dhe ka thënë se ka bindjen se Shqipëria do ta kryejë gjithë përafrimin e ligjeve shumë më shpejt se vendet e tjera.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
