Rama: Në mandatin e tretë, revolucioni digjital do të vijojë

Kryeministri i Shqipërisë, Edi Rama, prezantoi programin e Partisë Socialiste (PS) të shërbimeve për qytetarët dhe biznesin.

Digjitalizimi i shërbimeve

Duke rikujtuar radhën që duhet të mbanin qytetarët për të marrë qoftë edhe një dokument, shtatë vite më parë, Rama tha se nuk duhet harruar progresi. Ai foli edhe për korrupsionin që zhvillohej më parë, për të mos mbajtur radhë.

Kreu i qeverisë u ndal dhe te problemet e qytetarëve me faturat afrofe.

“Kjo ishte e gjithë çka ndodhej pas sporteleve, pas atyre sporteleve të zymtë, ku një dorë zgjatej e tërhiqej, zgjatej e tërhiqej për të marrë sa dhjetëra dokumente që ju vetë duhet të grumbullonit për një vërtetim të vetëm”, shtoi Rama.

Kryeministri deklaroi se janë rreth 1207 shërbime, ose 95% e shërbimeve që tanimë ofrohen online.

Falë digjitalizimit të shërbimeve në vend ka rënë korrupsioni apo fuqia e ryshfetit, i cili ka qenë masivisht i përhapur.

Ai tha se “1% ishin shërbime online deri para 7 vjetësh”.

“95% janë sot, por shikoni çfarë ndryshimi. Kur ne e kemi filluar revolucionin digjital, kemi numëruar gjithsej 51 mijë aplikime. Çfarë janë 51 mijë aplikime për shërbime kryesisht të pamarra asokohe, aplikime të mbetura në icloud në krahasim me 7.7 milionë aplikime të bëra në vitin 2020 me përgjigje të marrë”.

Digjitalizimi në biznes

Rama foli edhe për biznesin. Sot, sipas tij, kryen të gjithë ciklin që i duhet në raport me shtetin, ndërkohë që më parë i duheshin një kalvar kontaktesh. Të gjitha veprimet e biznesit sot kryhen përmes klikimeve.

Rama tha se sot biznesi kryen të gjithë ciklin që i duhet në raport me shtetin, ndërkohë që më parë i duhen një kalvar kontaktesh. Të gjitha veprimet e biznesit sot kryhen përmes klikimeve.

Kreu i qeverisë pohoi se revolucioni digjital do të vijojë.

“Revolucioni vazhdon. Mandati i tretë do ta transferojë këtë vend, ku shteti është në xhepin e qytetarit. Jo për t’i marrë nga xhepi, por për të marrë nga xhepi i tij kërkesën dhe për ta kthyer kërkesën në dokument të plotësuar fakt në smartphone-n e tij, për qytetarin dhe biznesin”.

Kryeministri premtoi se “dëftesat do të printohen me vulë elektronike, sapo të mbarojë digjitalizimi i gjithë sistemit para-universitar dhe do të fillojnë të përdoren qysh në vitin e ardhshëm shkollor”.

Rama u ndal edhe te shërbimet e transportit, që kanë një faqe komplet të re, porse ende nuk ka përfunduar digjitalizimi i procesit të brendshëm, pasi është në proces.

Ai tha se sot është bërë i mundur realizimi i vizës elektronike për punëtorët e huaj.

Rama bëri me dije se në vendin tonë kanë filluar të vijnë punëtorë të huaj. Ndërkohë, ironizoi të papunët shqiptarë, të cilën thonë se duan punë, duke qëndruar në kafe.

Ndër të tjera, rikujtoi disa arritje të qeverisë, si nafta falas, mbështetjet subvencionet, grantet për fermerët e vegjël dhe ata që investojnë.

Kryeministri tha se, në katër vitet e ardhshme, nuk do të ketë më policë nëpër rrugë, pasi çdo gjë do të jetë online.

“Me përfshirjen në sistem të monitorimit të trafikut, s’do të shihni më policë në rrugë. Do të vijë vetëm kur duhet, në rrugë. Nuk do të jetë më duke pritur e duke përcjellë. Gjithçka online”.

Kryeministri pohoi 75 shërbime të kadastrës shqiptare që ofrohen online.

Rama tha se PS-ja ka si objektiv që certifikatat e pronësisë, kartelat të jenë për të gjitha pronat online.

“E pra çfarë duam të bëjmë në mandatin e tretë? Ne duam që certifikatat e pronësisë, vërtetimet, kartelat e pasurisë, që jepen sot me vulën elektronike, falë digjitalizimit të 1.7 milionë pronave të shqiptarëve, të jepen për të gjitha pronat. Por kjo, do kohën e vet, sepse çdo pronë duhet nxjerrë nga ato hartat e tmerrshme”.

Digjitalizimi i Shërbimeve Konsullore

Ministrja për Evropën dhe Punët e Jashtme, Olta Xhaçka, tha se ndihej me fat që e mori drejtimin e ministrisë në një moment të jashtëzakonshëm.

“Shqipëria është sot një vend që respektohet për politikën e saj të jashtme në rajon, në BE, në NATO. Vlerësohet për politikat konstruktive që ka luajtur në vijimësi në rajon, duke u kthyer realisht në një faktor stabiliteti dhe pikë referimi për çdo iniciativë që ndodh në Ballkanin Perëndimor. Vlerësohet për perfomancën vërtet profesionale që tregoi gjatë presidencës së OSBE-së”.

Xhaçka njoftoi se brenda vitit 2022 do të bëhet plani i përfaqësive të përbashkëta me Kosovën dhe me SHBA-në.

Një portal tjetër, e-viza është dedikuar plotësisht për vizat. Ministrja për Evropën dhe Punët e Jashtme pohoi se në total janë marrë 1.3 milionë aplikime.

Xhaçka tha se po vijon puna për digjitalizimin e plotë të aktivitetit dhe shërbimeve konsullore e dhënies së informacionit.

“Duke filluar fillimisht procesin për heqjen e plotë të rezervave të vulës Apostille në të cilën përfshihen të gjitha vendet e BE-së apo realizimin e pagesës online për të gjithë shërbimet që ofrohen nëpërmjet portalit e-Albania, çka shihet si një nevojë imediate”.

“Do të vazhdojmë të punojmë edhe pas 25 prillit, për ta çuar këtë proces akoma më përpara”, përmbylli ajo.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.