![](https://albanianpost.com/wp-content/uploads/2024/04/pojopl.png)
Atacms, raketat me rreze të gjatë veprimi, kanë mbërritur në Kiev, fshehurazi, në fillim të muajit.
“Nuk u njoftua se ne po i japim Ukrainës” raketa Atacms të reja “sepse donim të ruanim sigurinë operacionale për Ukrainën, siç na kërkuan”, ka thënë koloneli Garron Garn, zëdhënës i Pentagonit.
Sakaq, nuk dihet saktësisht se sa raketa Atacm i janë furnizuar Ukrainës.
Në vjeshtën e vitit të kaluar, Shtetet e Bashkuara të Amerikës dërguan në Ukrainë versionin me rreze të mesme të raketave, të aftë për të goditur objektivat rreth 160 kilometra larg.
Tani, raketat e reja Atacm mund të ndryshojnë pamjen në terren pasi mund të lëshohen mbi 300 kilometra.
Karakteristikat e armëve i lejojnë Ukrainës të përdorë një qasje të ndryshme.
Forcat e Kievit u detyruan të heqin dorë nga terreni përgjatë Frontit Lindor, për shkak të inferioritetit në aspektin e njerëzve dhe municioneve.
Por raketat e reja Atacm mund të ofrojnë mbulim më të madh për ushtrinë e Kievit dhe mund të komplikojnë planet e Moskës, e cila muajt e fundit ka qenë e lirë të godasë qytetet ukrainase pothuajse çdo ditë me bastisje shumë të rënda.
Në qendër të vëmendjes është edhe lindja e Ukrainës.
Rusia vazhdon të bëjë presion, duke fituar terren në zonën e Ocheretyne, ku një kryqëzim hekurudhor është i një rëndësie të veçantë, dhe në fshatin Novobakhmutivka.
Forcat e Moskës u përpoqën gjithashtu të pushtonin pozicionet në zonën Chasiv Yar, rreth 40 kilometra më në veri, por deri më tani janë zmbrapsur.
Hyrja ‘zyrtare’ e Atacms me rreze të gjatë në teatrin e luftës detyron në mënyrë të pashmangshme Rusinë të rishikojë planet e saj.
Më shumë se një muaj më parë, Presidenti Vladimir Putin iu referua mundësisë së krijimit të një zone tampon për të mbrojtur rajonet që Moska ka aneksuar.
Rajoni i Kharkiv është vënë nën vëzhgim për t’u bërë objektivi i ofensivës që Rusia mund të nisë nga fundi i pranverës dhe fillimi i verës.
Ashtu si me shumë sisteme të tjera të sofistikuara të armëve të furnizuara në Ukrainë, administrata amerikane ka vlerësuar nëse përdorimi i tyre rrezikon të përkeqësojë më tej konfliktin dhe vendimi u mor pasi Koreja e Veriut furnizoi me armë të tilla Rusinë.
Administrata vazhdon të bëjë të qartë se armët nuk mund të përdoren për të goditur objektivat brenda Rusisë.
Zyrtarët amerikanë thonë se Ukraina ka filluar për herë të parë përdorimin e raketave balistike me rreze të gjatë, duke goditur një aeroport ushtarak rus në Krime dhe trupat ruse në një zonë tjetër të pushtuar.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com