Mikrobiologu, Lul Raka, ka thënë se Kosova është në shkallën më të ulët të vdekjeve nga COVID-19 në një milionë banorë së bashku me Gjermaninë.

Kështu ka bërë të ditur ai përmes një postimi në ‘Facebook’, i cili u shpreh se ky variant ka shënuar rritje masive edhe në Kosovë.

“Në raportin e fundit të ECDC (European Center for Disease Control), që përfshin periudhën kohore 10-23 Janar 2022, Kosova ka incidencë prej 1157 rasteve në 100.000 banorë. Nga shtetet e rajonit, Shqipëria ka 997 raste, Maqedonia 1099, Serbia 2805 e Mali i Zi 3798. Gjatë kësaj periudhe shkallën më të ulët të vdekjeve në 1 milionë banorë e kanë Kosova (5.01) dhe Gjermania (5.13)”, deklaroi Raka.

Ai ka sqaruar edhe shkallën e vdekshmërisë në shtetet e rajonit.

“Shtetet e rajonit kanë këtë shkallë vdekshmërie në 1 milionë banorë: Shqipëria 23, Serbia 52, Maqedonia 89, Mali i Zi 132 dhe Bosnja 146. Në Evropë, prinë Bullgaria me 161 vdekje/1 milion banorë. Infeksionet me Omicron kanë pasqyrë më të lehtë klinike, pasi që virusi lokalizohet kryesisht në rrugët e sipërme të frymëmarrjes. Inkubacioni mesatar është shkurtuar në 3 ditë”.

Për masat kufizuese, sipas tij të gjitha duhet të jenë në balancim me situatën epidemiologjike.

“Masat kufizuese varen nga faktorët shëndetësorë (numri i rasteve, spitalizimet, vdekjet, shkalla e vaksinimit), ekonomia, kapaciteti i shtetit për subvencione, shëndeti mental dhe të drejtat e njeriut. Balansimi i gjithë këtyre faktorëve është i vështirë dhe nuk është i njëjtë askund. Vendimet duhet të merren duke u bazuar në të dhënat epidemiologjike në kohë reale”.

Ai ka shtuar se infeksionet me Omicron kanë pasqyrë më të lehtë klinikë.

“Virusi lokalizohet kryesisht në rrugët e sipërme të frymëmarrjes. Inkubacioni mesatar është shkurtuar në 3 ditë”.

Ndërsa, ka thënë se shkalla e shtrimit në spital dhe vdekshmëria është më e ulët.

“Shkalla e shtrimit në spital dhe vdekshmëria janë më të ulëta sesa në valët e mëparshme pandemike. Një rol të rëndësishëm këtu ka luajtur edhe vaksinimi”.

Ndryshe, më 27 janar, në Kosovë kanë humbur jetën shtatë persona nga COVID-19 ndërsa janë regjistruar tre mijë e 917 raste të reja.

Rastet e reja kanë dalur pas testimit të 15 mijë e 268 mostrave.

Nga kjo shifër i bie se mbi 25 për qind e të testuarve kanë rezultuar pozitivë për sëmundjen COVID-19.

Në Kosovë, aktualisht janë 28 mijë e 751 raste aktive me COVID-19.

Deri më tani, të vaksinuar plotësisht me dy doza të vaksinës janë 803 mijë e 638 persona.

Në Kosovë, të gjithë personat nga mosha 12-vjeçare mund të vaksinohen kundër COVID-19.

Dozën përforcuese dhe atë të tretë mund ta marrin të gjithë personat mbi 18 vjeç që janë imunizuar me dy doza para tre muajsh