Rafa Nadal: Do të doja të bëhesha president i Real Madrid

Tenisti spanjoll Rafael Nadal ka dhënë intervistën e tij të parë që kur luajti ndeshjen e fundit pikërisht tetë muaj më parë, në Australian Open. Disa muaj më vonë atleti njoftoi se nuk do të luante për pjesën tjetër të sezonit. Tashmë, në një bisedë të gjatë me mikrofonat e “Movistar+”, Nadal është rikthyer për të folur për veten, vështirësitë dhe mbi të gjitha dhimbjet që mbart me vete.

“Unë thashë se ndoshta 2024 do të jetë viti im i fundit. Unë e konfirmoj këtë, por nuk mund të jem 100% i sigurt. Mendoj se ka një shans të mirë që kjo të ndodhë, sepse e di se si është trupi im, por si do të jem pas katër muajsh, nuk e di. Nuk jam i sigurt se çfarë do të bëj në vitin 2024, sepse gjithçka do të ndryshojë plotësisht në varësi të qëllimeve të mia”, tha Nadal.

Edhe pse tema e daljes në pension është e vështirë për Nadal për t’u diskutuar, tenisti vendos fajin për problemet e tij fizike, duke sugjeruar se mungesa e vëmendjes kur ishte më i ri kontribuoi në problemet e tij.

“Do të ndryshoja shumë gjëra në jetën time dhe në karrierën time. Kam marrë vendime të gabuara kur erdhi puna për të mbrojtur trupin tim”, tha Nadal.

Kur u pyet se çfarë donte të bënte pasi la pas tenisin, Nadal e ktheu shikimin te pasioni tjetër i tij i madh sportiv: futbolli. Pavarësisht lidhjeve të tij familjare me Barcelona-n, Nadal ka qenë gjithmonë një tifoz i Real Madrid-it , aq sa shpreson që një ditë t’i bashkohet klubit kryeqytetas.

“Po, do të doja të bëhesha president i Real Madrid-it. Por për momentin nuk ka asgjë për të thënë, sepse kemi presidentin më të mirë të mundshëm. Pastaj jeta merr shumë rrugë dhe duhet të vlerësosh nëse je i aftë të bësh disa gjëra”, përfundoi Nadal, me një objektiv, për të thënë të paktën, jo shumë ambicioz.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.