Ra pa ndjenja në fushë, ndërron jetë Raphael Dwamena

Një lajm i trishtë ka ardhur nga spitali i Kavajës pasi kapiteni i skuadrës së Egnatias, Raphael Dwamena ka ndërruar jetë.

Sulmuesi i skuadrës së Rrogozhinës, Dwamena ka ndërruar jetë në spital pasi më herët kishte rënë pa ndjenja në fushën e blertë gjatë takimit të kësaj të shtune në Abissnet Superiore mes skuadrës së tij dhe Partizanit.

Ganezi 28-vjeçar ra në fushë në minutën e 23, teksa e menjëhershme ishte ndihma nga lojtarët në fushë dhe stafet mjekësore të skuadrave. Më pas ai u shoqërua me ambulancë në ambientet e spitalit të Kavajës për të marrë një mjekim më të specializuar, por nuk mundi të mbijetonte.

Sipas mjekeve lojtari ka pësuar arrest kardiak në fushë. Gjatë transportit për në spital, ai ka pasur shenja jete, por pasi ka mbërritur në spitalin e Kavajës ka pësuar një tjetër goditje çfarë i ka marrë edhe jetën.

Kjo ishte hera e tretë në karrierën e tij që Dwamena binte pa ndjenja në fushë.

Sulmuesi njihej për problemet e tij në zemër, që i penguan, më herët, një karrierë që mund të kishte vazhduar në Premier League me Brighton.

Pikërisht në gushtin e vitit 2017, 28-vjeçari ishte shumë pranë realizimit të ëndrrës për të kaluar në Premier League-n angleze. Skuadra e Brighton kishte rënë dakord me Zurich-un (ish-ekipi i Dwamena asokohe) për transferimin e tij, por gjithçka u ndërpre kur testet mjeksore treguan probleme në zemrën e tij. Keshtu, ai mbeti te Zurich.

Ndonëse, ekzaminimet mjeksore te Brighton tregun probleme në zemrën e tij, ai përsëri vijoi të luante futboll dhe në gushtin e 2018 kaloi te Levante në Spanjë, pasi këta të fundit paguan 6.2 milionë euro për kartonin e tij.

Tetori i vitit 2019 do të sillte një goditje të madhe për karrierën e tij. Pas ekzaminimeve të reja mjeksore, mjekët i sugjeruan Dwamena-s tërheqjen e menjëhershme nga futbolli.

Ai, megjithatë, vazhdoi të luante pasi kishte vendosur një kardioverter-defibrilator të implantueshëm (ICD) në janar 2020.

Pas kësaj, karriera e ganezit do të vijonte në Danimarkë, ku nënshkroi për Vejle-n. Pasi debutoi me gol në 2020, ai luajti edhe katër ndeshje të tjera, përpara se mjekët ta ndalonin të luante për shkak të problemeve në zemër.

Për shkak të gjendjes së zemrës dhe disa matjeve shqetësuese, Vejle konfirmoi më 26 tetor 2020, se Dwamena nuk mund të luante për një periudhë. Më vonë, në nëntor 2020, drejtori sportiv i Vejle-s deklaroi se Dwamena kishte luajtur ndeshjen e tij të fundit për klubin.

Pavarësisht shqetësimit të mjekëve, ganezi nuk hoqi dorë nga futbolli. Ai u rikthye në Austri duke nënshkruar me Blau-Weiss Linz më 25 qershor 2021. Megjithatë, dy muaj më vonë, Dwamena do të pësonte tronditjen e parë të vërtetë. Ai u rrëzua në fushë gjatë një ndeshjeje të Kupës së Austrisë kundër TSV Hartberg dhe u shtrua në spital më pas.

“Zoti gjithmonë ka menduar mirë me mua”, tha Dwamena asokohe, duke shpjeguar se ngjarja erdhi si pasojë e goditjes që i dha defibrilatori. Edhe mjekët më pas konfirmuan se goditje të tilla nuk ishin të rrezikshme për jetën e lojtarit, ndonëse më e mira do të ishte që ai të mos luante futboll sërish.

Por, dashuria dhe pasioni i tij për futbollin bënë që të mos hiqte dorë nga ky sport. Në janarin e vitit 2023, Dwamena nënshkroi për një klub të vogël zviceran të kategorisë së pestë, BSC Old Boys. Atje ai realizoi tetë gola në 11 paraqitje, përpara se të mbërrinte në Shqipëri.

Por, tashmë, më e keqja ndodhi, Raphael Dwamena, një prej lojtarëve më të spikatur në Superiore ka ndërruar jetë. Ka ndërruar jetë duke praktikuar sportin që dashuronte pa masë, atë sport që ai nuk e priste se do t’i sillte më të keqen.

Raphael Dwamena, fenomeni i ri i Superiores

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.