Qytetarët protestojnë për heqjen e taksimit të profesioneve të lira, përpara Gjykatës Kushtetuese

Një grup qytetarësh dhe profesionistësh kanë dalë në shenjë proteste përpara Gjykatës Kushtetuese, rreth taksimit të profesioneve të lira, të cilin e quajnë një vendim jo të duhur prej Qeverisë shqiptare dhe po shkatërron bizneset.

Përmes kësaj demonstrate, ku të pranishëm janë si aktivistë nga shoqëria civile, ashtu edhe qytetarë të thjeshtë, kërkohet shfuqizimi i ligjit të tatimit mbi profesionet e lira.

“Me këtë ligj kërkojnë ta mbyllin biznesin. Po qe se tatimi nuk hiqet do e mbyll biznesin. I bej thirrje gjyqtarëve që ligji të jetë i barabartë për të gjithë”, u shpreh një prej qytetarëve në protestë.

Kjo protestë po ashtu është mbështetur edhe nga opozita e vendit.

Një muaj më parë, deputetja e Partisë Demokratike, Jorida Tabaku ka dorëzuar në Gjykatën Kushtetuese dokumente që sipas saj, vërtetojnë se taksimi i profesioneve të lira ka dëmtuar dhjetëra biznese.

Taksimi i profesioneve të lira, Tabaku në Kushtetuese: Politikë selektive e qeverisë

Tabaku, e cila ka dorëzuar padinë në emër të opozitës, tha se kjo taksë e padrejtë tregon politika selektive të qeverisë. Seanca publike për profesionet e lira, do të mbahet më 18 qershor.

“Sot ndodhemi në kushtet e cenimit të sigurisë juridike, sot ndodhemi në kushtet e shkeljes së Kushtetutës dhe sot ndodhemi në kushtet e një tatimi që shkon 30-40% për profesionet e lira, tatimi më i lartë në Republikën e Shqipërisë. Ne kemi folur shumë herë për sistemin e padrejtë që është ngritur po kësaj radhe kjo taksë e padrejtë është duke prekur jo vetëm profesionistët e lirë por një zinxhir shërbimesh”, tha ajo.

Sipas deputetes demokrate, taksimi i profesioneve të lira tregon politikë selektive të qeverisë.

“Unë përgjithësisht nuk kam dëshirë ti komentoj deklaratat e ndërkombëtarëve por besoj që FMN e ka pasur për faktin që sot ka shumë përjashtime nga sistemi, sot kemi hotelet me 5 yje që janë të përjashtuar . heqja e përjashtimeve duhet të nisë nga ata që rëndojnë ,ë shumë buxhetin e shtetit. Në këtë rast ne nuk po kërkojmë asnjë politikë selektive, ne po kërkojmë që profesionet e lira të trajtohen si gjithë bizneset e tjera, sipas xhiros dhe unë besoj që për këtë FMN nuk ka asnjë objeksion”.

Gjykata Kushtetuese do të shqyrtojë më 18 qershor në një seancë të hapur paditë për taksimin e profesioneve të lira, taksim që nisi më 1 janar dhe që parashikon taksim me 15% për profesionistët me të ardhura deri në 14 milionë lekë dhe 23% mbi 14 milionë lekë.

Çfarë parashikon paketa e re fiskale?

Janë 26 kategori të profesioneve të lira që do të tatohen, të ndara në 180 profesione sipas llojit të aktivitetit.

Të ardhurat nga punësimi do të tatohen sipas normave progresive 13% dhe 23%; të ardhurat neto nga biznesi sipas normave progresive 15% dhe 23%; të ardhurat nga investimi sipas normave respektive 8% dividendi dhe ndarjet e fitimit dhe 15% të ardhurat e tjera nga investimi.

Sipas paketës, sugjerohet një rritje të të ardhurave në arkën e shtetit dhe rregullime në disa sektorë.

Ndërsa, do të ketë një tavan prej 1.5% në rritjen dy-vjeçare të akcizave, e cila lidhet në mënyrë të drejtpërdrejtë edhe me normën e inflacionit.

Për uljen e këtij të fundit, Banka e Shqipërisë vendosi së fundmi edhe rritjen e normës bazë të interesit në 3.25%.

Thënë kjo, akciza e karburanteve, birrës, apo verës, nuk do të rritet me 11% si vitet e shkuara, por shtesa do të ndalet në vetëm 1.5%.

Nga ana tjetër, me rekomandim të Bashkimit Evropian, do të vendoset një taksë mbi industrinë e hekurit, çimentos dhe prodhimit të ferro-kromit.

Kjo, për shkak të emetimeve të karbonit që këto industri të rënda lëshojnë.

Këto kompani që përdorin qymyrin si lëndë të parë, paguajnë vetëm 3 lekë/kg si taksë karboni, dhe nga viti 2024 deri në 2030 ato do të paguajnë 15 lekë/kg.

Përjashtim nga taksat ndërkohë, sipas planit të Qeverisë, do të kenë importi i mëshqerrave dhe insekteve, ku përfshihen edhe bletët.

Në bazë të kësaj politike të re, synohet që të ketë një rritje të krerëve në vend si edhe zhvillim të mëtejshëm të bletarisë, apo stimulimit të prodhimeve të njohura si “bio”.

Ndryshime do të ketë edhe në ligjin për procedurat tatimore.

Kështu, nëse kompanitë nuk paguajnë në kohë tatimin korporativ apo mbi të ardhurat personale do të ketë gjoba proporcionale dhe jo fikse. Çdo ditë e papaguar, gjobës do t’i shtohet një kamatë me 0.06% e detyrimit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.