“QIKA” i reagon Gjykatës në Gjilan – Dhunimi nuk është “aventurë seksuale”

Qendra për Informim, Kritikë dhe Aksion (QIKA), me anë të një reagimi publik ka dënuar gjuhën seksiste të Gjykatës Themelore në Gjilan në aktëgjykimin ku shfajëson pesë burra të akuzuar për përdhunim sistematik të një vazje 19 vjeçare në vitin 2012.

“’Shuarje e epshit seksual’, ‘shprehi jo të mira morale’, ‘bredhje me meshkuj’, ‘aventura seksuale’ – këto janë vetëm disa nga shprehjet e përdorura nga Gjykata Themelore në Gjilan”.

“Arsyetimi i gjykatës për këtë vendim është skajshmërisht paragjykues në bazë të gjinisë dhe joprofesional. Gjykata i arsyeton të akuzuarit për dhunim duke thënë se vajza kishte pranuar të udhëtoj me taksi me të akuzuarin edhe pse ai ishte i gjinisë mashkullore”, vazhdon reagimi i kësaj organizate.

“Pra për gjykatën, fakti që një vajzë udhëton me taksi me një burrë nënkupton pëlqimin e saj për marrëdhënie seksuale dhe të drejtën e bashkudhëtarit mbi trupin e saj”.

QIKA shkruan se i rikutjojnë gjykatës dhe publikut të gjerë se integriteti fizik dhe seksual nënkupton të drejtën e secilit dhe secilës për të marrë vendime për trupin dhe jetën seksuale të tij/saj.

“Kjo është e drejtë fundamentale njerëzore që i takon individit sipas Kushtetutës së Kosovës (neni 26) prandaj për secilin akt seksual duhet të ketë pëlqim dhe pajtim të ndërsjellë. Kur dikush nuk jep pëlqim për akt seksual, kësaj i themi përdhunim!”.

“Kjo nuk është hera e parë që viktimat e dhunimit seksual paragjykohen nga institucionet ku ato kërkojnë drejtësi. Gjuha e përdorur në vendimet e gjykatave nuk është rastësi. Ajo shpërfaqë më së miri shtypjen gjinore dhe diskriminimin që po rëndon mbi gratë e që po mirëmbahet nga institucionet e vendit”.

QIKA e quan të i papranueshëm aktgjykim, dhe kërkojnë nga Këshilli Gjyqësor i Kosovës që menjëherë të ndërmarrë masa disiplinore ndaj gjykatësve të trupit gjykues të këtij rasti.

“Seksistat s’e kanë vendin në Gjykatë”, përfundon reagimi.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.