Qeveria ua ndan mbi 10 mijë euro përfaqësuesve të Luginës për vizitën në Gjermani

Qeveria e Kosovës ka mbajtur mbledhje elektronike të mërkurën, ku janë ndarë 10 mijë e 270 euro për një delegacion të Luginës së Preshevës.

Siç ka njoftuar zyra e kryeministrit, këto mjete janë ndarë si mbështetje për Këshillin Kombëtar Shqiptar në Serbi dhe përfaqësuesit e Preshevës, Medvegjës e Bujanocit, me qëllim të përkrahjes së aktiviteteve të tyre lobuese gjatë vizitës që ata pritet ta jenë në Gjermani këtë muaj.

Kjo nuk është hera e parë që Qeveria e Kosovës ndan mjete financiare për Luginën e Preshevës. Edhe në vitin 2021, ekzekutivi kishte ndarë 2 milionë euro për shqiptarët që jetojnë në Serbi.

Mirëpo, kishte pasur akuza për keqpërdorim të tyre. Këto akuza ishin bërë nga ish-kryetari i Preshevës, Shqiprim Arifi.

Ai kishte akuzuar ish-kryetarin e Këshillit Kombëtar Shqiptar, Ragmi Mustafën, për keqpërdorim të mjeteve, dhe se të njëjtat ua kishte dhënë organizatave të afërta me të dhe partinë e tij, Partinë për Veprim Demokratik (PVD).

“Lufta” me milionat e Kosovës në Preshevë

Ndryshe, shqiptarët që jetojnë në Luginë të Preshevës janë të diskriminuar vazhdimisht nga autoritetet serb.

Atyre nuk u lejohet as përdorimi i flamurit kombëtar.

Një nga çështjet që është ngritur edhe në Kongresin Amerikan, por edhe në Parlamentin Evropian, është pasivizimi i adresave që Beogradi po ua bënë shqiptarëve në Luginë, posaçërisht në Medvegjë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.