Qeveria thotë se e ka “të pamundur” ta komentojë draftin e statutit të Asociacionit

Zëdhënësi i Qeverisë së Kosovës, Përparim Kryeziu, ka thënë se e ka të pamundur të komentojë mbi vërtetësinë e draft-statutit të Asociacionit të Komunave me Shumicë Serbe të publikuar nga ish-Inspektori i Agjencisë së Kosovës për Inteligjencë (AKI), Burim Ramadani.

“Javëve dhe ditëve të fundit kanë qarkulluar në publik tekste të ndryshme të cilat janë raportuar si drafte të propozimit evropiano-amerikan. Si ekzekutiv e kemi të pamundur që të komentojmë mbi vërtetësinë e secilit prej tyre. Megjithëse për sa na takon neve, drafti i propozuar nga Gjermania, Franca, Italia, BE dhe ShBA-ja tashmë do të duhej të ishte publik, ne do të respektojmë konfidencialitetin e tij, sipas kërkesës së shteteve sponsorizuese”, tha Kryeziu për RTV 21.

Një ditë më parë, as këshilltari për media i zëvendëskryeministrit të Kosovës, Besnik Bislimit, Klisman Kadiu, nuk e ka mohuar e as pohuar faktin se draft-statuti i publikuar nga Ramadani është ai të cilën Qeveria e ka pranuar javë më parë.

“Në këtë proces që është ende duke vazhduar ka një konfidencialitet të bisedimeve që është thënë edhe nga ana e Bashkimit Evropian, në momentin që do të ketë dakordim që kjo draft-statut të bëhet publik, atëherë ai do të bëhet publik”, theksoi ai për RTK-në.

Publikohet draft-statuti “evropian” me të cilin është pajtuar qeveria, është pothuajse identik me statutin e propozuar nga Edi Rama

Të shtunën e 11 nëntorit, për herë të parë, u publikua një draft-statut i Asociacionit të Komunave me Shumicë Serbe, për të cilin u tha se është ai që Kosova e ka pranuar.

Draft-statuti që emisarët evropiano-amerikanë ia sollën kryeministrit Albin Kurti në zyrë më 21 tetor.

Ky draft, përmban 45 nene dhe ndahet në shtatë kapituj.

Te neni 12, te pjesa e bashkëpunimit, thuhet se Asociacioni  do të ketë të drejtë të bashkëpunojë, brenda fushave të kompetencave të anëtarëve të vet, me komunat dhe institucionet, “duke përfshirë agjencitë qeveritare në Serbi”.

Një bashkëpunim i tillë, theksohet aty, mund të marrë formën e ofrimit nga institucionet serbe të asistencës financiare dhe teknike, duke përfshirë pajisjet, në zbatimin e kompetencave komunale.

Ndërsa, parashihet që donacionet e mallrave dhe pajisjeve nga Serbia do të përjashtohen nga çdo taksë ose detyrim, në përputhje me legjislacionin në fuqi.

“Asociacioni mund të krijojë marrëdhënie dhe të hyjë në marrëveshje bashkëpunimi me asociacione të tjera vendore dhe ndërkombëtare të komunave, autoriteteve lokale, rajoneve dhe njësive të tjera të vetëqeverisjes lokale në shtetet tjera, në pajtim me ligjin në fuqi”, thuhet aty.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.