Qeveria “s’ka strategji” për dialog – vetëm del haptazi “kundër” politikave euro-amerikane   

Njohës të çështjeve ndërkombëtare besojnë se Qeveria aktuale e Kosovës nuk ka strategji sa i përket procesit të dialogut të ndërmjetësuar nga Bashkimit Evropian, e as që do të ketë dhe se ajo vetëm po kundërvënë hapur “politikat euro-amerikane”.

Ambasadori i Shteteve të Bashkuara të Amerikës në Serbi, Christopher Hill, tha të enjten në një intervistë për Radio Televizionin e Serbisë, RTS, se “ata që devijojnë nga dialogu rrezikojnë të devijojnë nga politika jonë”.

Një ditë më pas, ministrja e Punëve të Jashtme të Kosovës, Donika Gërvalla, u përkujdes të potencoi se për Kosovën momentalisht “është shumë e vështirë vazhdimi i procesit të dialogut” meqë Serbia po tregohet destruktive.

Megjithatë diplomati amerikan lavdëroi Serbinë për qasjen e saj në dialog ndërsa kritikoi Kosovën se po largohet nga dialogu me ndërmarrjen e “hapave të njëanshme”.

Për ligjëruesin universitar, Dritëro Arifi, këto deklarata kundërthënëse të kryediplomates kosovare në raport me ato të një diplomati si Hill, tregojnë se ekzekutivi kosovar nuk ka arritur të kuptojë që “ne dialogojm me SHBA-të, e jo me Serbinë”.

“Strategjia e kësaj qeverie sa i përket dialogut nuk ekziston fare. Përmes SHBA-së ne mund të shkaktojmë ndonjë efekt në Serbi, përndryshe rezultati nuk mund të jetë as zero, mund të shkojmë në minus, pra mund të kemi regres në dialog”, thotë ai për Albanian Post.

Thënë këtë, Arifi beson se nëse vazhdohet me këtë ritëm “mund të kemi izolim total të Kosovës në çdo element”.

Duke potencuar se politika është krijimi i balancit, Arifi vlerëson se Kosova “nuk mund t’ia mësojë SHBA-së se si duhet ta udhëheq politikën e saj të jashtme”.

“Kjo është absurditet dhe çmenduri në vetvete”, shtoi ai.

Ndërkohë për ish-zëvendësministrin e Punëve të Jashtme të Kosovës, Anton Berisha, deklaratat e qeveritarëve të Kosovës përveç se janë “një marrëzi politike” janë edhe një kundërvënie e hapur e “politikës euro-amerikane dhe shërbim të agjendave serbo-ruse”.

“Gërvalla në vazhdimësi është duke na turpëruar me paraqitjet e saj dhe duke identifikuar Kosovën të pa sens diplomatik deri në mungesë të kulturës elementare”, thotë ai për Albanian Post.

Në RTS, top-diplomati amerikan kritikoi Kosovën për situatën e krijuar në Veri të vendit dhe lavdëroi Serbinë për gatishmërinë e saj në raport me procesin e dialogut.

Në vlerësimin e tij Serbia po “punon shumë për dialogun” dhe po vepron mirë “duke iu përmbajtur këtij procesi”.

Ndryshe nga Hill, një këndvështrim krejt tjetër paraqiti të premten kryediplomatja kosovare, e cila tha se në këtë fazë Kosova është për “një rishikim të tërësishëm të procesit të dialogut” në mes të Kosovës dhe Serbisë, kjo për shkak të qasjes destruktive të Beogradit zyrtar.

“Me këtë qasje dhe me bllokimin e kufijve të Kosovës me një qasje vazhdimisht armiqësore me një gjuhë që nxit vetëm urrejtje e konflikte do të jetë shumë e vështirë vazhdimi i procesit në Bruksel, prandaj duhet të presim derisa të vijnë institucionet e reja, të vijnë bartësit e rinj të funksioneve të reja me shpresën se do të kenë një vizione më të qartë”, tha ajo.

Kosova aktualisht, sipas kryediplomates, po pret formimin e Komisionit të ri të Bashkimit Evropian meqë për momentin “është shumë i vështirë vazhdimi i procesit të dialogut”.

Megjithatë Hill, të enjten, në veçanti u përkujdes të nënvizoi faktin se SHBA-të “janë të pakënaqur kur dikush devijon nga dialogu ose ndërmerr hapa të njëanshme”.

“Ata që devijojnë nga dialogu rrezikojnë të devijojnë nga politika jonë. Ajo që mund të them është se Serbia ka punuar shumë për këtë. Serbia ka bërë mirë duke iu përmbajtur dialogut dhe unë vërtet do ta inkurajoja Serbinë që të vazhdojë me një gjë të tillë”, ka thënë Hill.

Në anë tjetër kryetari i Kuvendit të Kosovës, Glauk Konjufca, ditë më parë vlerësoi se bashkësia ndërkombëtare nuk po dëshiron që Kosova të fitojë procesin e negociatave me Serbinë me rezultat “5 me 0”.

“Nëse Qeveria e Kosovës arrin me shtri sovranitetin edhe sundimin e ligjit në çdo centimetër katrorë të Kosovës, kjo i bie që nëse negociatat në mes të Kosovës dhe Serbisë është një lojë e futbollit, kjo është si fitorja pesë me zero, e këta nuk po dëshirojnë që Kosova të fitojë pesë me zero, pra faktori ndërkombëtar”, tha ai në një intervistë për Klan Kosova, në emisionin “DPT TE FIDANI”.

Në konsideratën e tij nëse Kosova arrin që ta shtrijë sovranitetin në Veri të Kosovës, atëherë nuk ka më nevojë për negociata dhe se kjo është “brenga” e komuniteti ndërkombëtar – pra dështimi i procesit të dialogut i ndërmjetësuar nga Bashkimi Evropian.

“Negociatat në vitin 2011 kanë filluar se Kosova është pajtuar që nuk mund të bëjë në Veri sundimin e ligjit. Pse me bë negociata çfarë do të ndodhë me strukturat e MUP-it në Veri”, potencoi ai.

Kryekuvendari ndër të tjera potencoi se dialogu “duhet të përjetojë një ri-start, pra ri-formatizim”.

“Kjo i bie që me e bind Serbinë, që e ka pranuar Kosovën de facto dhe me u sjell si e tillë. çdo shteti i Serbisë që nuk na trajton si shtet de facto e bllokon dialogun”, shtoi ai.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.