Lajme

Qeveria publikon udhëzimin administrativ për çmimet e naftës


Ilustrim

Qeveria e Kosovës, ka publikuar Udhëzimin Administrativ të miratuar në mbledhjen e fundit për rregullimin e çmimit të naftës.

Sipas këtij udhëzimi administrativ, çmimi për marzhën tregtare maksimale për litër të produktit të naftës së shitur me shumicë është 2 cent, derisa për litër të produktit të shitur me pakicë është 12 centë.

Rregullimi i çmimeve dhe masat nga paragrafi 1 i këtij neni do të mbetet në fuqi tridhjetë ditë, përveç nëse shfuqizohen ose ndryshohen me vendim sipas nenit 7 të këtij udhëzimi administrativ.

Më 22 qershor, Qeveria e Kosovës kishte miratuar me unanimitet, udhëzimin administrativ për rregullimin e çmimeve për produktet e naftës dhe karburanteve të ripërtritshme dhe masat e tjera mbrojtëse, në Kosovë.

Por, kryetari i Shoqatës i së Naftëtarëve të Kosovës, Fadil Berjani në një përgjigje me shkrim për Albanian Post, pati lajmëruar se shoqata akoma nuk e ka pranuar këtë vendim nga Qeveria.

“Ne ende nuk e kemi pranuar vendimin nga Qeveria. Si dhe ende nuk e kemi mbajtur takimin me përfaqësues të kompanive që tregtojnë me naftë në Kosovë”, kishte deklaruar ai për AP.

Rritja e çmimeve të naftës dhe benzinës në Kosovë ka shënuar nivelin më të lartë në 20 vjetët e fundit, sipas Shoqatës së Naftëtarëve të Kosovës.

Për shkak të lëvizjes së shpeshtë të çmimeve, ka pasur dyshime se naftëtarët po i kurdisin çmimet.

Kurdisja e çmimeve ose marrëveshja për nivelizimin e çmimeve, është e ndaluar me Ligjin për mbrojtjen e konkurrencës në Kosovë.

Për mbikëqyrjen e fenomeneve të tilla, institucion kompetent është Autoriteti Kosovar i Konkurrencës, i cili ka rreth 11 muaj që nuk është funksional dhe kjo për shkak të mungesës së Komisionit Kosovar të Konkurrencës.

/Albanianpost.com


Lajmet kryesore