Gjykata Kushtetuese e ka shpallur antikushtetues vendimin e Qeverisë së Kosovës, të votuar më pas në Kuvend, për shkarkimin e njërës anëtare të Organit Shqyrtues të Prokurimit (OSHP), e cila si kryetare e panelit për rastin e një tenderi të insulinave votoi për kontraktimin e tyre pa garancitë e kompanisë për cilësinë e barit.

Sipas vendimit të Kushtetutës, as Qeveria dhe as Kuvendi s’kanë dhënë asnjë arsyetim lidhur me cenimin e pretenduar të etikës profesionale të anëtares së OSHP-së, Kimete Gashi.

“Bazuar në sqarimet e dhëna në Aktgjykim, as Qeveria dhe as Kuvendi nuk kanë dhënë asnjë arsyetim lidhur me cenimin e pretenduar të “etikës profesionale” të anëtares së OSHP-së, bazë kjo mbi të cilën ishte bërë propozimi dhe shkarkimi i saj”.

“Komisioni për Buxhet, Punë dhe Transfere i Kuvendit i kishte rekomanduar këtij të fundit të mos e miratojë propozimin e Qeverisë për shkarkim. Për më tepër, Gjykata Themelore dhe ajo e Apelit, kishin hedhur si të palejuar padinë dhe ankesën e Ministrisë së Shëndetësisë për anulimin e Vendimit të OSHP-së”.

Ndonëse në aktgjykim Kushtetuesja thekson që është i padiskutueshëm autorizimi i Kuvendit që të mbikëqyr OSHP-në, ky institucion është i kufizuar në dispozita kushtetuese.

“Përfshirë pavarësinë e Agjencive të Pavarura sipas përcaktimeve të vet Kushtetutës dhe ligjeve të cilat vet Kuvendi i ka miratuar bazuar në paragrafin 1 të nenit 65 [Kompetencat e Kuvendit] të Kushtetutës”.

Më 10 maj të 2023-së, Qeveria e Kosovës, kishte propozuar shkarkimin e anëtarës së Bordit të OSHP-së, Kimete Gashi, e cila u shkarkua në korrik të 2023-së.

Propozimi ishte bërë me arsyetimin se Gashi, sa kishte qenë kryetare e panelit për shqyrtimin e ankesave të tenderit të insulinave, nëpërmjet vendimit për kontraktimin e një lloji të këtij bari pa garancinë e cilësisë ka rrezikuar qytetarët.

Kryeministri i Kosovës, Albin Kurti, në mbledhjen e Qeverise kishte thënë se Gashi ka marrë vendim të dëmshëm në kurriz të qytetarëve.

“Nuk ka ligjshmëri e as punë për të mirën e interesit publik kur vendimmarrja anashkalon interesin e qytetarëve e aq më tepër kur e njëjta shkel ligjin në fuqi. Brenda kompetencave që ka Qeveria do ta dënojë çdo sjellje e veprim të dëmshëm pa marrë parasysh subjektin që merr vendimin”, deklaroi ai.

Ndërsa organizatat që e monitorojnë prokurimin publik kishin thënë se do të duhej të shkarkoheshin të tre anëtarët që votuan për lejimin e insulinave pa garancitë e cilësisë.

Organizatat Demokraci Plus, Grupi për Studime Juridike dhe Politike, Iniciativa për Progres, Instituti Demokratik i Kosovës, Instituti i Kosovës për Drejtësi dhe Lëvizja FOL i bënë thirrje Qeverisë që t’i trajtojë të gjithë anëtarët njësoj.

Shkelësit serikë të Kushtetutës