Qeveria po favorizon komunat e udhëhequra nga LVV-ja, Bulliqi: Kritikat janë të pabaza  

Kritikat se partia në pushtet është duke i favorizuar komunat që janë nën udhëheqjen e Lëvizjes Vetëvendosje, për sa i përket ndarjeve buxhetore për këtë vit, sipas kryetarit të Komunës së Podujevës, Shpejtim Bulliqi, nuk qëndrojnë.

Nga 38 komuna sa janë gjithsejtë në Kosovë, vetëm Gjilani, Kamenica, Podujeva e Shtimja udhëhiqen nga Lëvizja Vetëvendosje.

Sipas Institutit GAP nga 51.2 milionë euro investime kapitale të reja të nivelit qendror për këtë vit, 22 milionë janë destinuar për projekte specifike në komuna, ku 52 për qind e kësaj shume, pra 12 milionë euro do të orientohen, te tri komunat e udhëhequra nga LVV, komuna që mbulojnë 9 për qind të territorit dhe 8 për qind të popullsisë.

Megjithatë sipas Bulliqit, ndarjet buxhetore bëhen në mënyrë të barabartë për të gjitha komunat.

“Kjo nganjëherë krijon edhe keqkuptime edhe krijohet përshtypja që ka dallime përndryshe vërehet një ndarje e barabartë e buxhetit, dhe sigurisht që ndonjë projekt edhe mund të jetë ma pak ose më tepër, por këto gjëra gjithmonë kanë ndodhur në ndarjet buxhetore. Buxheti i komunës së Podujevës këtë vit është diku rreth 27.5 milionë euro, një buxhet solid i cili besoj që po arritëm ta shfrytëzojmë ashtu si duhet do të na zgjedh problemin e zgjedhjes së një numri projektesh për qytetarë”, ka deklaruar Bulliqi, në një intervistë për Ekonomia Online.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.