Qeveria ndan mbi 21 milionë euro “Contour Global”, Kurti: Mirë që projekti s’u realizua

Mbi 21 milionë euro i ka ndarë Qeveria e Kosovës kompanisë amerikane “Contour Global” pasi Kosova humbi arbitrazhin në tetor të vitit 2023.

Në mbledhjen e Qeverisë së Kosovës, kryeministri i Kosovës, Albin Kurti, ka vlerësuar se projekti në fjalë nuk ka qenë i dobishëm për Kosovën në momentin që kur ishte planifikuar.

“Fatkeqësisht, ndërprerja e qeverisë tonë në pranverën e vitit 2020 dhe ardhja e një qeverie antikushtetuese la zbrazëti për ta trajtuar këtë çështje dhe për t’u siguruar se Kosova të mos kishte pasoja të mëdha. Me gjithë pasojat, është shumë më mire që projekti i tillë nuk është realizuar sepse një mbrapshti e tillë nuk ka vazhduar, por ka përfunduar”, ka thënë Kurti.

Sipas Kurtit avokatura shtetërore në këtë drejtim ka bërë një punë të suksesshëm.

“Ajo që kemi fituar në arbitrazh është pothuajse shtatëfishi i kësaj që duhet të paguhet”, ka thënë ai.

Gjatë mbledhjes së Qeverisë së Kosovës, ministrja e Punëve të Jashtme, Donika Gërvalla, e ka pyetur ministrin e financave, Hekuran Murati, nëse do të mbahet dikush përgjejgës për këtë kontratë.

Sipas Muratit, hetimi i takon organeve të drejtësisë.

Murati ndër të tjera ka potencuar se marrëveshja mes Kosovës dhe “Contour Globalit” ishte nënshkruar në dhjetor të vitit 2017, pavarësisht paralajmërimeve se një kontratë e tillë nuk do duhej të nënshkruhej.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.