Qeveria miraton masat emergjente për energjinë elektrike: Situata me rrymën mund të përkeqësohet

Në mbledhjen e 118-të të Qeverisë së Kosovës, ministrat kanë miratuar masat emergjente për furnizim me energji.

Në këtë mbledhje, kryeministri i Kosovës, Albin Kurti, ka thënë se furnizimi me energji mund të përkeqësohet.

“Duke marrë parasysh se çështja aktuale me energji mund të përkeqësohet dhe çmimi i importit mund të shënojnë rritje gjatë këtij muaji dhe muajve në vijim, Qeveria ka propozuar masa për energji”, tha Kurti.

Në anën tjetër ministrja e Ekonomisë, Artane Rizvanolli, ka bërë thirrje që Korporata Energjetike e Kosovës (KEK) dhe KOSTT-it, të marrin masat e nevojshme për furnizim të rregullt me energji elektrike.

“Duke qenë se furnizimi me energji elektrike vazhdon të jetë në rrezik që lidhet me rritjen e çmimeve në fund të muajit shkurt e mars veçanërisht, propozojmë masat emergjente në mesin e të cilave me ndalimin e përdorimit të energjisë për prodhimin e kriptovalutave”, ka theksuar Rizvanolli.

Qeveria gjithashtu ka emëruar edhe drejtorët e rinj të bordit të Kompanisë Rajonale të Ujësjellësit, “Hidrodrini” në Pejë.

Kryeministri Kurti propozoi emrat e drejtorëve dhe vendimi u miratua me votim unanim.

“Jusuf Nikçi do të jetë kryesues i bordit, anëtarë të të cilit u emëruan Mevlyde Kelmendi – Begolli, Simon Balaj dhe Driton Sylça. Mandati i tyre do të zgjasë tre vjetë”, tha Kurti.

Qeveria e Kosovës në mbledhjen e mbajtur të mërkurën ka miratuar edhe Projektligjin për parqet industriale dhe teknologjike.

Ministrja e Industrisë, Ndërmarrësisë dhe Tregtisë, Rozeta Hajdari, ka thënë se ky Projektligj ka për qëllim të rregullojë themelimin dhe menaxhimin e parqeve industriale teknologjike.

Hajdari ka thënë se synojmë që të ofrojmë përmirësimin e infrastrukturës së institucionet vendore dhe të huaja.

Qeveria e Kosovës në këtë mbledhja ka ndarë 70 mijë euro për promovimin e librit për “Reçaku” të ish-ambasadorit të OSBE-së në Kosovë, William Walker.

Gjithashtu janë ndarë edhe 100 mijë euro për mbështetje të Fondacionit amerikano-kosovar për Edukim si dhe 250 mijë euro për organizimin e eventit “Muri i Nderit” nga Fondacionit shqiptaro-amerikan.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.