Qeveria Kurti çështjen e të zhdukurve e ka përzier me temat politike, thotë Qerkini

“Qeveria Kurti çështjen e të zhdukurve e ka përzier me temat politike”, thotë Bajram Qerkini që udhëheq me Qendrën Burimore për Persona të Zhdukur.

Ndonëse shton se janë formuar disa komisione, thotë se pak është bërë në këtë drejtim.

“Kjo Qeveri e ka përzier me politikë dhe për dy fjalë apo tri, pse nuk po munden me gjet gjuhë të përbashkët në Bruksel, e kanë anuluar edhe procesin e personave të pagjetur. I kanë bërë disa lëvizje edhe disa komisione dhe nën-komisione, pa rezultate të cilat ne e kemi ditur se do të bëhet shumë më shumë se që kanë bërë deri më tani”, tha Qerkini për Ekonomia Online.

Madje, sipas tij, “asnjë Qeveri nuk them që s’ka bë asgjë, bile është përpjekur”.

“Por tash e dy vjet është ngrit çështja e personave të pagjetur, për shkak se në vend që të punohet ashtu siç është me konventa ndërkombëtare e paraparë për zbardhjen e fatit të të pagjeturve të punohet në aspektin human e jo politik mjerisht, te ne është përzier politika dhe ka stagnuar”, shtoi ai.

Ai ka theksuar se kryeministri Albin Kurti nuk i ka vizituar kurrë.

“Mendojnë se janë më të mençur. Më të mençur se amerikanët, më të mençur se anglezët, më të mençur se krejt shtetet e QUINT-it.Na po dalim më të mençur se të gjithë. Nuk po gjejmë gjuhë të përbashkët me miqtë tanë, me njerëz që duhet të gjejmë gjuhë të përbashkët.

Sipas autoriteteve në Kosovë, të pagjetur vazhdojnë të jenë edhe rreth 1 mijë e 630 persona, kryesisht shqiptarë.

Në luftën e fundit në Kosovë sipas Fondit për të Drejtën Humanitare, janë vrarë rreth 13 mijë e 500 persona. Shumica prej të vrarëve janë civilë shqiptarë.

Nga viti 2000 e deri në vitin 2008, krimet e luftës në Kosovë janë hetuar nga Misioni i Kombeve të Bashkuara (UNMIK), ndërsa që nga viti 2008 Misioni i Bashkimit Evropian për Sundimin e Ligjit (EULEX) është përgjegjës për hetimin e krimeve të luftës.

Në vitin 2018, ky mision i ka dorëzuar dokumentet në Prokurorinë e Kosovës dhe në gjykatat vendore.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.