Qeveria e Serbisë të enjten diskuton “për dërgimin apo jo të trupave në Kosovë”

Qeveria e Serbisë, në mbledhjen e saj të radhës, pritet të vendosë për dërgimin apo jo të kërkesës në Komandantin e KFOR-it, për alokimin e 1 mijë pjesëtarëve serbë nga institucionet e sigurisë për në Kosovë.

Kështu të paktën raporton e përditshmja serbe, Danas.

Lajmin se Qeveria e Serbisë të enjten do të marrë një vendim për këtë, e pati dhënë edhe presidenti i Serbisë, Aleksandër Vuçiç, në fjalimin e tij të hënë para publikut.

Ditë më parë kryeministrja e Serbisë, Ana Bërnabiç dhe i ashtuquajturi drejtor i “Zyrës për Kosovën” në Qeverinë e Serbisë, Petar Petkoviç, deklaruan se udhëheqja e Serbisë është afër një vendimi për të kërkuar vendosjen e trupave të sigurisë serbe në Kosovë, duke pretenduar se jetët e minoritet serb atje janë në rrezik.

Megjithatë ky pretendim i zyrtarëve serbë u kundërshtua në mënyrë të prerë nga ana emisarit special të Shteteve të Bashkuara të Amerikës për Ballkanin Perëndimor, Gabriel Escobar, në një intervistë të dhënë për Radio Evropa e Lirë.

Sipas top-diplomatit amerikan Kosova ka garanci të forta sigurie nga ShBA-të dhe rrjedhimisht një gjë e tillë nuk është e mundur të ndodhë.

“Ne e kundërshtojmë këtë kategorikisht, e hedhim poshtë kategorikisht. Nuk e mbështesim këtë fare. Unë gjithashtu dua të them se Kosova ka garanci shumë të forta sigurie nga ShBA-të”.

Një lëvizje të tillë të Beogradit nuk e përkrahë as Gjermania.

Ministrja e Punëve të Jashtme të Gjermanisë, Analena Baerbock, ka thënë se kthimi i ushtrisë serbe në Kosovë është i papranueshëm.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.