Qeveria e Kosovës s’merr përgjegjësi, kërkon nga “Trepça” rritje të prodhimit

Qeveria e Kosovës ka deklaruar të enjten në një deklaratë për shtyp se përkrahja financiare për ndërmarrjen “Trepça” varet nga zotimi se do të ulen shpenzimet dhe do rifillojë rritja e prodhimit, derisa minatorët e kombinatit metalurgjik që disa javë kanë refuzuar të dalin në vendin e punës për shkak të mosekzekutimit të pagave dhe shujtave ushqimore që nga muaji qershor.

“Përkrahja financiare varet nga plani dhe zotimi konkret që do të ulen shpenzimet dhe do të rifillojë rritja e prodhimit… Nuk ekziston asnjë rrugë tjetër përpos punës dhe angazhimit intensiv, rregullit, kontrollit dhe drejtimit të përgjegjshëm të ndërmarrjes për sukses”, ka thënë ajo, derisa ka pretenduar se “Trepça” ka operuar me humbje gjatë gjysmës së parë të vitit.

“Pavarësisht mbështetjes që qeveria i ka dhënë gjatë gjysmës së parë të këtij viti, ndërmarrja Trepça Sh.A. ka operuar me humbje si rezultat i ngecjeve në prodhim dhe të hyrave të pamjaftueshme”, thuhet në reagimin e qeverisë.

“Ministria e Ekonomisë ka përkrahur ndërmarrjen me subvencione në vlerë prej 3.3 milionë euro, që është përtej shumës së planifikuar për të gjithë vitin. Megjithatë, këto mjete nuk u kanë mjaftuar për të siguruar mbulimin e shpenzimeve operative dhe pagave të punonjësve, që përbëjnë pjesën e konsiderueshme të shpenzimeve të ndërmarrjes”, ka shtuar qeveria.

Qeveria e Kosovës ka theksuar ndër të tjera se pret që ndërmarrja “Trepça” të marrë masa në mënyrë që të ngritet kontrolli i brendshëm operativ e financiar, dhe reforma rrënjësore që transformojnë afarizmin e tyre.

“Ne jemi të bindur se me një bashkëpunim të ngushtë dhe përkushtim të përbashkët, mund të arrihen përmirësime të ndjeshme dhe rezultate pozitive për ndërmarrjen Trepça dhe për të gjithë punonjësit”, thuhet në komunikatë.

Minatorët e Trepçës kanë hyrë në ditën e 23-të grevës për shkak të mosekzekutimit të pagave dhe shujtave ushqimore. Përfaqësuesit e minatorëve të Trepçës kanë potencuar se ka pasur shitje në “Trepçë” gjatë këtij viti, prandaj e kanë parë të paarsyeshëm mosekzekutimin e pagave.

Kryeshefi i Trepçës dhe Qeveria Kurti të painteresuar për hallet e mbi 700 minatorëve

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.