Qelaj: Gjatë vitit 2022 u cenuan ndjeshëm të drejtat e njeriut

Avokati i Popullit, Naim Qelaj, konsideron se gjatë vitit 2022 janë cenuar të drejtat e njeriut në shumë raste.

Ai ka përmendur disa nga ngjarjet, ku konsideron se nuk është arritur plotësimi i agjendës së Avokatit të Popullit.

“Ka qenë vit sfidues, kjo për faktin se qysh në fillim të vitit patëm disa raste që cenuan ndjeshëm të drejtat e njeriut. Filloi viti me një vrasje të një gruaje nga bashkëshorti i saj, pastaj pati shumë zhvillime në komplet shoqërinë tonë që ndikuan drejtpërdrejt edhe në punën tonë dhe nuk arritëm në mënyrë të duhur t’i përmbahemi agjendës dhe planifikimeve që i kishim bërë prej vitit paraprak”, thotë ai për agjencinë e lajmeve KosovaPress.

Qelaj, bëri të ditur se institucioni i Avokatit të Popullit ka kategorizuar tri fusha me të cilat është marrë gjatë vitit të kaluar.

“Kryesisht tema që kemi trajtuar gjatë këtij viti mund t’i ndajë ose grupojë në tri çështje më kryesore, e para ka të bëjë me të drejtën për jetë, mbrojtjen nga dhuna në familje si rezultat i vet situatës që u krijua nga rasti i vrasjes së gruas në Llaushë, pastaj dhe në fund të vitit me dy raste tragjike që e tronditën krejt shoqërinë, e në këtë rast edhe neve si institucion i Avokatit të Popullit”.

“Çështja e dytë që kemi trajtuar ose segmenti i dytë me të cilin jemi marrë shumë ka të bëjë me gjendjen e personave me aftësi të kufizuara, respektimin e të drejtave të tyre, duke iu bashkangjitur fushatës me të cilën u shpall ky vit, si vit i personave me aftësi të kufizuara”.

Ndërsa, ka sqaruar se defekte ka edhe në zbatimin e Ligjit për Mbrojtjen nga Diskriminimi nga vetë zyrtarët që janë kompetentë për ta bërë një gjë të tillë.

“Fusha e tretë ku jemi marrë shumë këtë vit është analizimi i Ligjit për Mbrojtjen nga Diskriminimi. Në fakt duke analizuar këtë ligj ne kemi analizuar vet aspektin e diskriminimit duke mbajtur kontakte me shoqërinë civile, me organizata dhe me institucione që janë të ngarkuar për të zbatuar këtë ligj”.

“Edhe këtu kemi parë që ka shumë defekte në zbatimin e këtij ligji, duke filluar nga informimi i publikut për përmbajtjen që ka ky ligj, për të drejtat që siguron dhe garanton, për mekanizmat për t’i trajtuar rastet e diskriminimit e deri te pjesa e informimit apo vetëdijesimit të zyrtarëve që janë kompetentë për të zbatuar ligjin, siç janë gjykata, organet administrative dhe organet e tjera e duke përfshirë pozitën edhe të zyrtarëve për mbrojtjen nga diskriminimi dhe barazi gjinore”.

Për rastet e ankesave që janë dorëzuar në Institucionin e Avokatit të Popullit, ai thotë se prijnë rastet e zvarritjeve të procedurave gjyqësore.

“Janë ushtruar 1514 ankesa në institucionin e Avokatit të Popullit. Struktura për nga aspekti racional është e përafërt me strukturën e demografike që ka popullata. Vërehet një tendencë në rritje të ushtrimit të ankesave nga komunitetet jo-shumicë, gjë që neve na bën me u ndje mirë për faktin se gëzojmë besueshmëri edhe tek qytetarët e komuniteteve tjera”.

Nga rekomandimet që ka nxjerrë Avokati i Popullit, vitin 2022 nuk janë zbatuar as gjysma e tyre, prej tyre janë 13 raste të hetimeve nga ankesat e qytetarëve dhe mbi 100 letra-rekomandime.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.