PZAP vendosë: Rinumërim në Podujevë

Paneli Zgjedhor për Ankesa dhe Parashtresa, ka vendosur për rinumërimin e të gjitha fletëvotimeve për kandidatët për Kuvend Komunal në komunën e Podujevës.

Kështu ka bërë të ditur përmes një postimi në llogarinë e tij në Facebook, kandidati për asamble në komunën e Podujevës, Xhevdet Maloku, nga radhët e Lëvizjes Vetëvendosje, i cili edhe ka bërë ankesën.

“Zyrtare, Podujeva në rinumërim total. Sot pranuam vendimin e PZAP i cili na e pranojë ankesën e 119 kandidatëve për Kuvend Komunal. Dhamë një shembull që të bashkuar mund t’ia dalim, do e mbrojmë çdo votë e cila ende gjendet në kuti të votimit”, ka shkruar ai.

Ndërkaq, kandidati për kryetar të komunës së Podujevës, Shpejtim Bulliqi, nga radhët e Lëvizjes Vetëvendosje, për Albanian Post, ka thënë se nuk është i njoftuar në lidhje me këtë vendim.

“Ju lutem bisedoni me zotëri Malokun, sepse nuk jam në dijeni për këtë çështje”, ka thënë Bulliqi.

Ndërkohë, Xhevdet Maloku, ka publikuar edhe dokumentin e PZAP-së, në të cilin thuhet se është pranuar e bazuar ankesa e Xhevdet Malokut nga Lëvizja Vetëvendosje, të cilit i janë bashkangjitur edhe 119 kandidatë nga LVV, LDK, PDK, AAK, NISMA, PP, kundër vendimit të Komisionit Qendror të Zgjedhjeve, për shpalljen e rezultateve përfundimtare për zgjedhjet lokale të 17 tetorit.

“Urdhërohet Komisioni Qendror i Zgjedhjeve të rinumërojë të gjitha fletëvotimet për kandidatët për Kuvend Komunal në Podujevë, nga të gjitha subjektet politike”, thuhet në vendimin e PZAP-së.

Në Podujevë garojnë Ekrem Hyseni i LDK-së, i cili në raundin e parë mori 44.20 për qind dhe Shpejtim Bulliqi i LVV-së me 44.16 për qind.

Ndërkaq, fushata zgjedhore për raundin e dytë të zgjedhjeve lokale, fillon nga kjo e hënë, zyrtarisht.

Valmir Elezi, zëdhënës në Komisionin Qendror Zgjedhor ka njoftuar se kjo fushatë do të zgjasë vetëm pesë ditë.

“KQZ-ja ka vendosur për kohëzgjatjen e fushatës zgjedhore të raundit të dytë të Zgjedhjeve për Kryetarë të Komunave”.

“Janë 5 ditë në dispozicion të subjekteve politike dhe kandidatëve të tyre për të zhvilluar aktivitetet në kuadër të fushatës zgjedhore, duke filluar nga 8 nëntori deri më 12 nëntor”, ka shpjeguar Valmir Elezi.

Votimet për raundin e dytë të zgjedhjeve do të mbahet të dielën më 14 nëntor.

Raundi i dytë i zgjedhjeve do të mbahet në 21 komuna ku asnjëra nga kandidatët për kryetarë të komunave nuk arriti të marrë 50+1 për qind të votave.

Sipas Ligjit për Zgjedhjet Lokale, rundi i dytë i zgjedhjeve ndërmjet dy kandidatëve, të cilët kanë fituar më së shumti vota të vlefshme, mbahet më 14 nëntor.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.