Pushteti e opozita përplasen për marrëveshjet e 2013-së dhe 2015-së

Një shkrim i kryeministrit të Kosovës, Albin Kurti, i publikuar të premten ku tha se dy marrëveshjet me Serbinë njëra e nëshkruar në vitin 2013 nga ish kryeministri Hashim Thaçi dhe tjera e nënshkruar në vitin 2015 nga ish kryeministri Isa Mustafa, për çështjen e Asociacionit të Komunave me Shumicë Serbe, shkelnin parimet e Kushtetutës dhe cenonin rendin juridik dërgoi në reagime të shumta nga ish kryeministrat e Kosovës dhe të opozitës aktuale.

Ky shkrim i kryeministrit fillimisht u kritikua nga nënkryetarja e Partisë Demokratike të Kosovës, Vlora Çitaku, e cila tha se kryeministri Kurti do të mbahet mend vetëm si “Kryeministri i Autonomisë Politike për serbët e pjesës veriore të Kosovës”.

“Kryeministri Kurti iu paska rikthyer sot përsëri marrëveshjeve të vitit 2013 dhe vitit 2015 – ato që numri dy i partisë së tij, Kryetari i Kuvendit, Glauk Konjufca, ka thënë se janë të mira dhe të dëshiruara”, ia rikujtoi fillimisht Çitaku, Kurtit.

Gjithsesi, sipas sekretares së PDK-së, “në interes të tij dhe për pak oksigjen ditor politik, ai qenka mundu me u marrë prapë me Presidentin Thaçi, ani pse ai po bën tri vjet e gjysmë i mbyllur në Hagë – në mbrojtje të luftës së shenjtë të popullit tonë për liri”.

“Është e pabesueshme se si një gjë Kryeministri Kurti nuk e ka kuptuar ende. Që Hashim Thaçi, edhe kundër vullnetit të tij, do të mbahet mend si Kryeministri i Pavarësisë së Kosovës”.

Sipas saj, Thaçi “ka ndërtuar autostrada moderne, shkolla, i ka rritur pagat, ka ndërtuar institucionet dhe ka vënë në binar funksionimin e shtetit”, por kryeministrit Kurti e vetmja trashëgimi që do t’i mbetet në CV është “ura tri metra e Saradranit”.

Pas Çitakut, i menjëhershëm ka qenë reagimi i ish kryeministrit të Kosovës dhe deputetit të Lidhjes Demokratike të Kosovës (LDK), Avdullah Hoti, duke thënë marrëveshja e vitit 2015 ishte bërë në koordinim me partnerët dhe ka paraparë dërgimin në Kushtetuese të çdo drafti të Asociacionit të Komunave me Shumicë Serbe.

Derisa ka shtuar se dakordimi që ka bërë Albin Kurti me Serbinë, me Marrëveshjen Bazë, e përmban autonominë për serbët.

“Marrëveshja e vitit 2015 është bërë në dakordim me miqtë dhe ka siguruar dërgimin në Gjykatën Kushtetuese të çdo drafti të asociacionit.  Ndërkaq, marrëveshja e Kurtit e vitit të kaluar në Bruksel dhe Ohër e përmban autonominë për serbët”, shkroi Hoti.

Sipas ish-kryeministrit, moskoordinimi dhe përplasja me aleatët e ka sjellur Kosovën në situatën ku “nuk flitet më për marrëveshje finale me njohje reciproke, që ishte duke u negocuar nga qeveria paraprake”.

Fatkeqësisht, shtoi deputeti i LDK-së, “tani flitet për zbatim të Asociacionit që tanimë ka marr premisa të një autonomie”.

“Mashtrimet se: nuk ka dialog pa kërkim falje dhe kthimin e të pagjeturve, ka kushte për zbatim të Asociacionin dhe e mashtrime të tjera kanë dalë sheshit”, përfundoi ai.

Reagim ka pasur edhe nga ana e ish kryeministrit të Kosovës, Isa Mustafa, i cili nënshkroi marrëveshjen e vitit 2015.

Mustafa, shkrimin e Kurtit e quajti fillimisht “sajesë dhe gënjeshtër”.

Mustafa, përmes një shkrimi në rrjetin social ‘Facebook’ ka sqaruar se Kushtetuesja se ka trajtuar marrëveshjen e vitit 2013.

“Askund nuk figuron se kjo marrëveshje shkel kushtetutën, por thuhet se Asociacioni do të themelohet sipas kësaj marrëveshje”.

“Në pikën III.  KONSTATOHET që parimet, siç; janë elaboruar në ‘Asociacioni/Bashkësia i komunave me shumicë serbe në Kosove -Parimet e përgjithshme/Elementet kryesore’, nuk janë tërësisht në përputhshmëri me frymën e Kushtetutës. Askund nuk konstatohet se është shkelur Kushtetuta, por se këto parime ‘nuk janë tërësisht’ ( pra jo tërësisht) në përputhshmëri me frymën e Kushtetutës”, thuhet në reagimin e Mustafës.

Tutje, ish kryeministri i Kosovës, ka kërkuar sqarim nga Kurti se çfarë realisht nënkuptonte me shkelje të Kushtetutës.

“Nëse dokumenti i vitit 2015 do të ishte shkelje e Kushtetutës, atëherë si do të nxirrej obligimi nga ky dokument (pika 2 dhe 21 e tij) për trajtimin nga gjykata Kushtetuese të Statutit dhe të ndryshimeve në Statut”.

“Apo z. Kurti ka interes që këtë ta shpallë antikushtetuese për t’i ikur trajtimit të statutit në Gjykatën Kushtetuese. Sidoqoftë shkelja e Kushtetutës është sajesë dhe gënjeshtër e z. Kurti”, ka thënë Mustafa.

Në anën tjetër, ai kritikoi marrëveshjen e vitit 2023 duke thënë se heq dorë nga njohja reciproke.

“Pika 7 e marrëveshjes së z. Kurti instalon autonominë politiko territoriale të komunitetit serb, kufijtë e autonomisë dhe arbitrazhin ndaj rendit kushtetues të vendit (siç janë përcaktuar me draft statut)”.

“Kishës Ortodokse serbe i  garanton zyrtarizmin e statusit të saj, që s’është as më pak dhe as më shumë sesa eksterritorialitet, ose shtet në shtet. Nuk kam  dëgjuar ta ketë kërkuar këtë ndonjëherë Gjykata Kushtetuese!”, ka thënë Mustafa.

Kosova dhe Serbia kanë arritur marrëveshje për themelimin e Asociacionit të Komunave me Shumicë Serbe më 2013, por ai ende nuk është themeluar, teksa Qeveria në Kosovë është deklaruar kundër një asociacioni njëetnik.

Kosova dhe Serbia arritën Marrëveshjen Bazë në shkurt 2023 në Bruksel, ndërkaq më 18 mars në Ohër, u pajtuan për Aneksin e zbatimit të kësaj marrëveshjeje.

BE-ja paralajmëroi se do të shtojë trysninë mbi të dyja vendet për zbatimin e kësaj marrëveshjeje.

Marrëveshja, mes tjerash, kërkon marrëdhënie të mira fqinjësore, njohje reciproke të dokumenteve dhe simboleve shtetërore, si dhe respektim reciprok të sovranitetit dhe tërësisë territoriale.

Ajo kërkon po ashtu nga palët që të mos e pengojnë njëra-tjetrën në proceset integruese, por s’kërkon njohje të ndërsjellë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.