PS zyrtarizon Benet Becin për Bashkinë Shkodër

Benet Beci do të jetë kandidati i Partisë Socialiste për qarkun Shkodër, siç e ka bërë me dije sekretari i Përgjithshëm i kësaj force politike, Damian Gjiknuri, gjatë një interviste televizive.

Sipas tij, për Shkodrën ky është një çast shumë i mirë dhe vetë Beci, është një kandidat shumë serioz, ndaj si i tillë, është deklaruar për të qenë përfaqësues i të majtëve në Shkodër.

Me lëvizjen e fundit të deputetit nga qarku verior, Agron Çela, nga radhët e Partisë së Lirisë drejt PS-së, shanset e Becit shtohen edhe më tej për fitore, duke parë ndikimin që vetë Çela ka në zonë.

Sa i përket bashkive të tjera, në Elbasan, siç ka bërë Gjiknuri me dije, është e padiskutueshme fitorja e kryetarit aktual të bashkisë, Gledian Llatja.

Tirana nuk do të shohë surprizë kandidati gjithashtu, me projektimin e kreut aktual të kryeqendrës së Shqipërisë, Erion Veliaj, për një mandat të tretë.

Asgjë zyrtare ndërkaq nuk ka në Durrës apo bashki të tjera, për të cilat pritet ende zyrtarizimi.

Më 6 janar 2023, ishte kreu i socialistëve, Edi Rama, ai i cili mblodhi të 12-ë drejtuesit socialistë të qarqeve në vend, për një plan mobilizimi mbi zgjedhjet e 14 majit, me qëllim arritjen e fitores në sa më shumë bashki të jetë e mundur.

Drejtuesit e qarqeve veriore të vendit e kanë nisur raportimin e tyre e më pas, rrjedha e diskutimeve ka qenë e përqendruar për nga Tirana dhe Durrësi – dy prej bashkive më të mëdha në vend.

Pjesë e diskutimeve kanë qenë edhe bashkitë e jugut, ku ndryshimi më i madh pritet të jetë ai i Vlorës, pas krisjes që ka pasur mes kreut të selisë rozë dhe kryetarit aktual të bashkisë Vlorë, Dritan Leli.

Llogaritë elektorale

Sekretari i Përgjithshëm i Partisë Socialiste, Damian Gjiknuri, bëri me dije gjatë mbylljes së vitit 2022, se të majtët e kanë një minimum bashkish, të cilat i kërkojnë t’i fitojnë me patjetër më 14 maj.

Ky numër i “artë”, është 40!

“Partia Socialiste nuk zbret nën 40 bashki. Këto janë llogaritë elektorale në Shqipëri. Për aq kohë sa nuk ka alternativë të besueshme në krahun tjetër”, ka thënë ai gjatë takimi me gazetarët në 23 dhjetor.

Gjiknuri, i pyetur se kur do të zyrtarizohen kandidatët e PS-së për zgjedhjet vendore, nënvizoi se shumë shpejt Kryesia do të miratojë një udhëzim për zgjedhjen e tyre.

Këtë, duke vijuar konsultimet me strukturat dhe jashtë strukturave.

Nga ana tjetër, ai ka kritikuar procesin e zgjedhjeve të brendshme të zhvilluara në Partinë Demokratike.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.