“PS nuk mbështet ndarjen e re territoriale, në zgjedhje me 61 bashki”

“Më 14 maj do të shkojmë në zgjedhje me 61 bashki”.

Kryetari i Grupit Parlamentar të Partisë Socialiste, Taulant Balla deklaroi këtë të hënë se PS nuk mbështet një ndarje të re territoriale.

“Mund të ketë bashki të re vetëm nëse ka mbi 5 mijë banorë. Ka qenë dialog shumë konstruktiv, megjithëse nuk arritëm në një përfundim të përbashkët. Më shumë se numri duhet të prevalojë cilësia e shërbimeve për qytetarët”.

10 ditë më parë Partia Demokratike dhe Socialiste nuk arritën dakordësinë për reformën territoriale, duke dalë me dy raporte të ndryshme.

Kryetarja e Komisionit, Anila Denaj tha se socialistët i qëndrojnë ndarjes së vendit në 61 bashki, me vetëm disa rekomandime që sipas saj do të përmirësojnë reformën e 2014, por jo shtim të numrit të bashkive.

“Përfaqësimi i zonave rurale mund të rishikohet. Shtimi I taksave të ndara. Rritja e kompetencës së administratorëve në ofrimin e shërbimeve publike, rishikimi i nivelit të pagave, qartësimi i kompetencave të vetëqeverisjes vendore, plotësimi dhe përmirësimi sektorial, rishikimi i kompetencave të qarkut”.

“Njësitë e qeverisjes vendore, nga 61 në 94, popullsia mesatare nga 75 mijë në 50 mijë në njësitë vendore, të ardhurat me një rritje minimale, shpenzimet, pritshmëria është për rritje, në 2114 këshilltarë. Nëse do të shkojmë në 6 qarqe të mëdha, ath kemi rreth 15 njësi vendore për qark, decentralizim financiar”, tha Çupi.

Dy raportet tashmë do t’i dërgohen parlamentit që do të miratojë apo rrëzojë njërin prej tyre.

Kujtojmë se dy javë më parë Grupi Parlamentar i Partisë Demokratike (PD) publikoi raportin e tyre final sa i takon Reformës Territoriale.

Në Komisionin e ngritur për këtë çështje ekspertët e caktuar nga PD-ja kërkuan ritjen e numrit të bashkive nga 61 në 92 bashki dhe uljen e numrit të qarqeve nga 12 në 6 rajone.

Edhe pse me dy grupime brenda së djathtës, krahu i Sali Berishës ka kërkuar të njëjtën gjë, por me ndryshim numrash: 95 bashki dhe pesë rajone.

Ndryshe nga tetë vite më parë, PD-ja dhe PS-ja kanë rënë dakord që të nisin punën për reformën territoriale.

PD-ja, nga njëra anë, kërkon që analiza për ndarjen territoriale të nisë që në themelet e vitit 2014, me qëllim që të bëhet rishikimi i ndarjeve të Bashkive.

Nga ana tjetër, PS-ja synon shkrirjen e qarqeve dhe organizimin e territorit në rajone.

14 maji, data zyrtare e zgjedhjeve vendore në Shqipëri

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.