PS nismë për krijimin e nënkomisionit që do të kontrollojë KLSH-në, Shalsi: Marrëdhënie e re mes dy institucioneve

Në mbledhjen e Komisionit parlamentar për Ekonominë dhe Financat, deputeti Eduart Shalsi ka prezantuar nismën e Partisë Socialiste (PS) në lidhje me krijimin e një nënkomisioni, i cili do të merret me verifikimin e punës së Kontrollit të Lartë të Shtetit (KLSH).

Ai ka deklaruar se synohet krijimi i një marrëdhënieje të re mes Kuvendit dhe KLSH-së.

Mirëpo, opozita e ka quajtur një propozim të tillë, lëvizje politike për të kontrolluar KLSH-në.

“Ky është një sulm ndaj institucioneve të pavarura”, u shpreh deputetja demokrate  Jorida Tabaku.

Mazhoranca nga ana tjetër paralajmëron nismë për auditimin e sektorit publik.

Më herët, kryetari Eduard Shalsi ka pyetur kreun e KLSH, Arben Shehu, për çështjen e akulloreve të kontaminuara në vitin 2021, të cilën ai e përmendi në raportimin e tij një ditë më parë.

Kreu i KLSH: Janë tregtuar akullore të kontaminuara me Oksid Etileni, AKU asnjë masë

“Dje pas deklaratës tuaj kemi marrë shumë mesazhe shqetësuese nga qytetarët për akulloret e kontaminuara për të cilat AKU kreu veprimet e duhura menjëherë dhe i largoi nga tregu pas sinjalizimit. Po ju pyes direkt, çfarë ju shtyu në vitin 2024 të sillni çështjen e vitit 2021, që nuk e keni ngritur në raportet e viteve të mëparshme?”, ka pyetur Shalsi.

“Dje është hedhur bombë, shashkë, quajeni si të doni. Ky komision është njohur me diçka. Shashkë apo e vërtetë, nuk di ta them. Këtij komisioni i janë shpjeguar efektet kancerogjene për një lëndë në akullore, e cila nuk është raportuar në vitin 2022 as në vitin 2023 nga KLSH. Për këtë çështje janë alarmuar njerëzit dje. Ne kemi përgjegjësi për të ballafaquar faktet për këtë çështje”, ka vijuar Shalsi.

Të dy më pas kanë shkëmbyer replika lidhur me kallëzimin e skandalit të Onkologjikut.

“Jemi përpara disa situatave shumë sensitive por kërkojnë zgjidhje të menjëhershme, por s’do doja ti bëja të ditura këtu për të mos alarmuar”, është përgjigjur Shehu.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.